Omumvo omupe nomvula ta yi loko

OODAMA nomilonga otadhi udha omeya koombinga adhihe dhoshilongo sho omvula ombwaanawa ta yi tsikile okuloka okuza tuu pehulilo ashike lyomumvo gwa yi sigo ongashingeyi.

Omata omawanawa oga loko oshilongo ashihe unene tuu kuumbangalantu, mokati koshilongo noshowo kuuzilo woshilongo. Omvula ye poola oya yelekwa mesiku lyotango lyomumvo nguka pokalando ka Kaukueyo, mpoka omvula yoomilimeta 93, 7 ya li ya loko. Omanga omvula yoomilimeta konyala dhivule 100 ya loko momudhingoloko gwa Rundu konima ashike yoKrismesa. Omvula ombwaanawa oya yelekwa piilando ngaashi Ondangwa, Oshikango, Oshakati nOkahao, moka Ondangwa ya lokwa omvula yoomilimeta dhi vule 50 uule womasiki gaali. Miitopolwa yomuumbangalantu wopokati, ngaashi Oshaanda, Oshomeya, nOtjiwarongo mbika oya lokwa omvula yoomilimeta dhivule 30 okuza esiku lyomumvo omupe. Omanga pOkakarara omvula yoomilimeta 56,8 oya loko okuza mu gaali ga Januali nuumvo.Nonando oshitopolwa shopokati koshilongo osha taamba omvula ya loko uule womasiku ga landulathana, omuloka gu li pombanda ogwa yelekwa po Rehoboth mpoka pwa lokwa omata gevule oomilimeta 50 okuza mesiku lyotango lya Januali nuumvo. Aatengeneki yombepo oya ti omvula ombwaanawa oya tegelelwa natango uule woshiwike shika moshilongo ashihe. Pahapu dhomutengeneki gwombepo , Simon Dirkse otaku kala iikogo, mbyoka tayi eta omvula yoombadhi muuninginino mbugantu noshowo pokati koshilongo. Omanga moshihupe shoshilongo otamu holoka omvula nomingungumo, noshowo omvula ondhigu oya tegelelwa yi loke muumbangalantu ninginino.