Omumati gwehokololo kombinga yaantu moRundu a tila aantu

OMUGUNDJUKA ngoka a lundilwa kutya okwa holola puuyelele omaukwatya gaakalimo yamwe yomo Rundu kombinga yonkalo yawo yo HIV oku li monkalo yuutile ngashingeyi.

Omugundjuka nguka okwa hokololwa a li nyola omadhina gaantu yamwe moRundu pehala lye po Facebook mo Internet kutya mbaka oye na oHIV. Aantu yahamano yomwaamboka a popi oye mu ningile oshipotha naashika oshe mu kwatitha nokwa tulwa mondholongo. Mackenzie Khaeb[28] okwa mangululwamo mondholongo etiyali oshiwike shayi oshoka kapena uumbangi wagwana oku mukaleka moka. Ndele ngashingeyi nguka oku na uutile kombinga yegameno lye oshoka mboka a nyola otashi vulika ye mu ehameke nenge ye mu ningile uuwinayi. Okwa holokele mompangu yamengestrata omaandaha goshiwike shayi poRundu. Konima yoku mangululwa kwe okwa londo okambesa nokushuna koShaanda hoka oko kaandjawo. Okwa ti okwa tila kutya aantu mboka a nyola kombinga yuundjolowele wayo ota shi vulika ye mu ponokele. Yamwe yaamboka ya tumbulwa ku Khaeb oya lombwelele Nampa kutya otaya ka konga omugundjuka nguka noku mu pula ngele oye mu tsakaneke shaampoka. Oya ti okwa nyateka omadhina gawo noshowo okwa luudhiksa uukwatya waantu oyendji moshilando shoka. Gumwe gwaamboka okwa ti ita ka thuwa nando omanga inaa pula Khaeb kutya uuyelele mbuka okwe waadha peni na ishewe kutya sho ewu longitha owe mu etele uuwanawa wa shike. Iihokolola pohofa omaandaha gaziko oya li ya hili ongundu yaantu oyendji poRundu mwakwatelwa naamboka omadhina gawo ga popiwa. Opolisi oya li yina oku hadha aantu ayehe mboka ya yi mohofa okutala ngele kayena iikondjitho. Khaeb okwa li a tula omadhina momusholondondo gwa lukwa Rundu Re-loaded, moka a shanga mboka yena oHIV noshowo yamwe aniwa yeli omashenge. Mbaka oya kwatelamo naanangeshefa ya tseyika nawa poshilando shoka.