Omulumentu omugundjuka ta pangulilwa okuteta nekatana

OMUMATI omugundjuka moVenduka ngoka ta tamanekelwa oku teta ko okwaako kwokolulyo kwomukadhona gwe oshiwike sha yi ota kala natango miikaha yaapolisi, konima yeholoko lye mompangu metitano.

Oshiponokela shekatana osha ningwa megumbo limwe moKatutura, molukanda lwa Havana metiyali lyoshiwike sha yi, sho Hileni Nakanyala[24] a kanitha oshikaha she shokolulyo, sho kwa tetwa ko nekatana.Nakanyala aniwa okwa ponokelwa komumati gwe, Lukas Dhimbulukweni (25), konima aniwa sho emu tseyithile kutya okwa hala oku mweetha po. Moshiponokela, Nakanyala okwa dhengwa nekatana komutse, sho a kambadhala okwiigamena, ekatana olya teteko oshikaha she shokolulyo. Na ku mu ponokela okwa fadhuka po sho aashiinda ye ya okupopila Nakanyala.Oshiningwanima shika osha ningilwa mepandaanda lya Walvisbay moHavana. Nakanyala okwa li ta pangwa sigo oompaka moshipangelo shomoVenduka.Dhimbulukweni okwa kwatelwe komiyadhashinana metitatu, nokwa holokele komeho gamengestrata, Frans Anderson mompangu ya mengestrata moVenduka etitano. Mengestrata okwa tseyithile, Dhimbulukweni uuthemba we wopampango na kutya ota vulu oku indila ekwatho lyopampango. Dhimbulukweni, ota tamanekelwa onkambadhaala yedhipago, ta yi leshwa pamwe nompango yokukondjitha elongitho lyoonkondo lyomomagumbo. Dhimbulukweni okwa tseyithile ompangu kutya okwa hala okukonga omutseyimpango gwopaumwene oye emu kalelepo.Omweeti gwiipotha , Salomé Bampton okwa indile oshipotha shika shi undulilwe komeho. Mengestrata okwe shi undulile komeho sigo 15 January 2010 opo omakonakono ga ningwe. Pethimbo ndyoka Dhimbulukweni ota vulu okumona omukalelipo gwo pampango. Mengestrata okwa ti, Dhimbulukweni na kale konima yekumba sigo ota holoka ishewe mompangu omumvo tagu ya.