Banner Left
Banner Right

Omulumenhu a yasha omukainhu nouta mOhangwena

OMULUMENHU (32) okwa mangwa po eshi vati a yasha omukainhu weedula 44 nouta medimo komukunda wedina Eexwa moshitopolwa shEenhana moshitopolwahoololo shaHangwena.

Omukonakoni woimbuluma mOhangwena omupedu komufala Melanie Mbuuru okwa koleka oshingwanima eshi Oshoondaxa, ta ti osha ningwa lwopotundi 21h30 Etitano.

“Otaku tiwa vati omufeekelwa okwa longifa outa wanangongo noshikuti ndee ta yashe omukainhu medimo, ndee tashi anyene mo,” Osho a ti ngaho.

Okwa ti nakuningwa oshihakanwa okwa li a twalwa koshipangelo shEenhana e li monghalo itai nuwa meva nokonima okwa ka tuminwa koshipangelo shepangelo shaShakati.

Mbuuru okwa ti omufeekelwa okwa li ta tamanekelwa oshibofa shonghendabala yedipao nokwa li a teelelika a holoke momhangu yamagestrata onghela.

Omakonakono opolifi otaa twikile.
Natango, omulumenhu okwa li a tuwa molwoimaliwa yokulanda omalodu kOngwediva Etitatu loshivike sha dja ko.

Omuunganeki woibofa yoimbuluma yopolifi koshitopolwa shaShana, omupedu komufala Fredericks Ndjadila, okwa ti oshiningwanima eshi sha ningilwa komukunda wedina Omeege.

Okwa ti omufeekelwa okwa pula nakuningwa oshihakanwa (30) opo e mu pe oshimaliwa shi fike poN$20 a ka lande omalodu, ashike nakuningwa oshihakanwa okwaanya.

Ovalumenhu ava vavali ova tameka nee okutanguna fiyo nakuningwa oshihakanwa ota tokola a ye keumbo.
“Manga e li mondjila tai keumbo, eemita dishona okudja poukamba, omufeekelwa okwa kufa ombele ndee ta tu nakuningwa oshihakanwa mombuda nokwa ninga eembululu mbali,” Ndjadila osho a ti ngaho.

Nakuningwa oshihakanwa okwa li a twalwa koshipangelo shaShakati nonghalo yaye otai nuwa omeva.
Omufeekelwa okwa mangwa po.

Moshikumungu vai shimwe inashi lifa, omukainhu (20) okwa li vati a nyekwa oinima yaye komulungu wondjebo, okwa nyeekwa nee ongodi yopeke needola omulongo kovalumenhu vavali kOngwediva Etitatu.

Ndjadila okwa ti oshiningwanima eshi osha ningilwa konima yofikola yaMweshipandeka Senior Secondary School.
Ovalumenhu ava vavali okwa li ovatwaalelwa motekisa omo omukainhu ou kwa li a londa, osho a ti ngaho.

“Otaku tiwa vati konima ashike v akoya Omweshipandeka Senior Secondary School, omushingi okwa lundulula ondjila ndee ta shingi a lamba odalate yofikola.

Mokati omo, ovafeekelwa vavali ova ponokela nakuningwa oshihakanwa, tave mu pula a yandje keshe shimwe osho a li e na.
“Omufeekelwa umwe okwa kufa mo ondjebo ndee temu ulike,” Osho a ti ngaho.

Ovalumenhu ova kufa ko ongodi yomukainhu yongushu yoshimaliwa shi fike poN$3 500 needola omulongo odo a hangika e kwete, osho a ti ngaho.

Ndjadila okwa ti ovalumenhu vati ova ningila omukainhu omatilifo kutya na dje mo mohauto ndee tai ina keuka opo aha yashwe mombuda.
Omakonakono opolifi otaa twikile. Nampa

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News