Omulumenhu okwa li a ponokelwa kongadu manga kwa li te likosho momulonga waKavango komukunda wedina Kafuma moshitopolwahoololo shaKavango Uninginino.
Eshi kwa li ta pulwa koThe Namibian manga e li moshipangelo, Damian Haikera (22) okwa ti okwa li a ya komulonga nelalakano lokukateka omeva nokukelikosha.
Haikera okwa ti okwa li a monifwa oshiponga neenghono. “Okwa li ndi li omutumba poumeva vaxupi omanga handi likosho keemadi.
Eshi nda mana okukosha omadi yokolulyo, ongadu oya ponokela nge,” Haikera sho a ti ngaho.
Okwa pula nee evatelo shaashi okwa li pu na oukadona vavali nomulumenhu umwe ve li popepi.
“Onda kendabala ashike kakwa li shipu shaashi ongadu okwa li tai nanene nge mokati komeva. Ovanhu ovo va li po okwa li ashike tava tale nge handi nanwa kongadu,” Haikera osho a ti ngaho. “onda kondja nayo handi kamutulula omayoo ayo neenyala dange.”
Okwa ti ongadu oye munana oshinano shi fike lwopeemeta 75. “Onda vatelwa komulumenhu oo kwa li ta lifa eengobe.
Okwa nukila momulonga nekatana konima eshi a mona nge handi kondjo nongadu,” Haikera osho a weda po ngaho.
Mwene womukunda Andreas Kauma onghundana ei okwe i uda Etine.
“Inandi ya ko natango keumbo lanakuningwa oshihakanwa ndi ka popye novadali vaye shaashi onda uda kutya okwa li a tuminwa koshipangelo shepangelo koRundu.” Okwa ti oupyakadi pokati kovanhu noinamwenyo oshinima shakula tashi twikile.
“Alushe ohatu pula ovanhu vetu vaha yowe ile vehe likoshe momulonga pefimbo lefundja,” Kauma osho a ti ngaho.
Okwa ti oinamwenyo yoludi eli ohai kala ihapu pefimbo apa.
Kauma okwa ti elelodoolopa ola pitika opo ovanhu va tule omeva momaumbo avo.
“Ovanhu vamwe ove na eepomba momaumbo, ashike natango ohava i ashike va ka tale omeva komulonga ile va ka koshe,” Osho a ti ngaho.
Kauma okwa pula oshiwana opo shi kale kokule nokuyowa nokukala komulonga efimbo lile pefimbo lefundja.
Omupopiliko woministeli yomidingonoko, omakuti nomatalelepo Romeo Muyunda okwa ti oibofa yomaupyakadi pokati koinamwenyo novanhu oyo ya lopotwa moshitopolwahoololo otai udifa nai.
“Otu na omulandu womaupyakadi pokati koinamwenyo novanhu noministeli ihai futu nande nakuningwa oshihakanwa ile nakufya, ashike nee, oministeli ohai vatele ovo va kumwa koshinima eshi,” Muyunda osho a ti ngaho.
Okwa ti oministeli otai pula ovakwashiwana opo ve likaleke kokule noinima oyo tai dulu okweeta omaponokelo oludi eli.
Komufala wopolifi koshitopolwa shaKavango Uninginino Raimbeth Muronga okwa koleka oshiningwanima eshi.
“Nakuningwa oshihakanwa okwa xupa ashike oku na okaoko kokolulyo ka teka, noipute komadi yokolulyo nokokaoko kokolumosho.
Okwa li a vatelwa komukwashiwana nokwa li a twalwa koshipangelo shepangelo koRundu,” Muronga osho a ti ngaho.
“Oshiwana otashi kunghililwa opo shi kale sha tonata nokulikaleka kokule nokuyowa momulonga pefimbo eli lefundja nokukala yoo vali vahapu ngee tava i komulonga.”
Muronga okwa ti omulonga ou yadi omeva, noinamwenyo ya nyika oshiponga ngaashi eengadu, eendjabameva nomayoka oya ninga ihapu.
Okwa weda po vali kutya omakonakono otaa twikile.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
