OMULUMENHU weedula 27, womokunda Ohangwena moshitukulwa sha Hangwena, okwa okwa dipaya omukainhu waye nomona wavo wokamati eshi evatwa neembele oikando ihapu shi nyanyalifa, teva tomekele monduda yavo yokunangala omanga ineli twala kOpolifi yemwene.
Omufekwalwa oo edina laye itali dulu okupopiwa paife, okwatwa neembele omukainhu waye oikando omilongo mbali nayihamano, omilongo mbali nanhatu monhulo omanga emutwa lutatu kombunda, nokutwa yoo okamona keemwedi hamano oikando iheyali.
Konima eshi a mana okulonga oilonga eyi youpwidi, okwa tomeka nomundilo ondunda oyo hava nangala omo muna oimhu. Konima eshi a tomekelamo omalutu, omutamanekwa okwe litwala yemwene kOpolifi yaHangwena oko a lopota eshi a ningapo. Eshi osha ningwa oufiku wOsoondaha potundi lwopotundi: 23h20. Konima eshi opolifi ya fika ponhele opo, oya hanga omundilo wa dima nale.
Otaku hokololwa kutya omundilo eshi wa xwika onduda, owa ka kwata yoo koiyalomwa yavo nokutomeka omidimba, wayina nomona omanga omundilo inau lidima woovene. Otaku hokololwa kutya omundilo owa xwika omalutu aa avali ashike inaapya unene omanga omundilo inau lidima woo vene, osho opolifi oyo yali ponhele ya hokolola.
Eshi sha etifa oshilonga eshi shinyanyalifa inashi shiivika natango ashike nomutamanekwa okwa holoka nomangu yaMangesitalata waHangwena onghela.
Oonakufya ova tumbulwa kutya ovo Berta Kashile womido 22 noshoyo Tangenyomwene Mudjanima Kamudulunge weemwedi hamano.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
