OMULONGISIKOLA Omukulu gwopOkahao mOngandjera a tseyika nawa Irja Sheehama gwomomukunda Uukwalumbe mOshitopolwa sha Musati, ngoka wo a kala a tseyika nawa nedhina Gwamukwa, okwa mana oondjenda dhe meti 1 Januari 2011, moshipangelo sha Kahao mepipi lyomimvo omilongohetatu nantano (85).
Nakusa Gwamukwa oye nakuvala omunangeshefa, Sion Sheehama mwene gwoongeshefa dhomafumviko dhedhina Zionist Funeral Services. Sion Sheehama, ngoka a tseyitha eso lya yina ko The Namibian, ota ti kutya meme gwawo okwa hakukilwa kedhengo lyomutima esiku ndyoka noya itaala kutya olyo lye mu faalele, konima sho ye mu eta moshipangelo sha Kahao meti 1 Januari 2011.Nakusa Gwamukwa otaku tiwa okwa longa Osikola yaanona pOkahao mpoka uule woomvula omilongone nayimwe (41). Kakele kokulonga osikola, Gwamukwa okwa kala wo omunandjungu mEgongalo lyawo lya Kahao ELCIN moka a kala omulongisikola gwOsikola yOsoondaha nosho tuu omwiimbi kamana mOngundulwiimbo lwEgongalo nokwa kala wo omuviyaki momayakulo galwe mEgongalo lya Kahao.Kuku Gwamukwa, okwa thiga ko omusamane gwe Jason Sheehama, oyana yaali aamati, Sioni na Immanuel noshowo aatekulu yaheyali. Sion Sheehama ota ti yina ota fumvikwa mOlyomakaya ngaka (8 Januari 2011) pOkahao okuzilila megongalo lya Kahao, omanga oshituthidhimbuluko she tashi ningwa mEtitano (07/01/2011) komatango, pegumbo lyawo, pootatekulu Jason Sheehama pUukwalumbe mpoka, okutameka pontano (17H00) yokomatango, omanga oshituthifumviko, mOlyomakaya pOkahao, tashi tameke pomugoyi (09H00) gwongula.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
