Omulongisikola i idhipaga nondjembo mOnooli

OPOLISI mOshitopolwa sha Hangwena oya lopota kutya Werner Tuhafeni Namufohamba gwomomukunda Ohembe popepi nOlupandu mOukwanyama mOshitopolwa sha Hangwena ngoka a kala omulongisikola pOsikola Onyika Combined School momukunda Olupandu, okwa mana oondjenda dhe ombaadhi lila ongula yOmaandaha ga zi ko sho i iyaha nondjembo ye yOmbistoli.

Omupopiliko gwOpolisi mOshitopolwa sha Hangwena Shisaande Abner Iitumba, kepulo kutya oshike shi idhipagitha Werner, okwa ti kaye shi shi natango, molwashoka nakusa Werner nguka ina thiga po okambapila kasha kutya okwiidhipagela shike. Ashike Shisaande Iitumba okwa ti kutya Opolisi otayi konaakona oshiningwanima shika.Omupopiliko gwOplisi nguka mOshitopolwa sha Hangwena Shisaande Iitumba ta ti kutya yo mOshitopowla sha Hangwena oya lulilwa noonkondo komaimangeleko taga pula komeho noonkondo noye na omaipulo kutya oshike ando tashi ningwa po opo ga mwenekwe. Iitumba ta ti sigo oompak,a, momvula ndjika, mOshitopolwa sha Hangwena omwiimangeleka aantu ye li omilongondatu nayatano nale nomaidhipago mwene, ngoka ga thikama unene mokwiimangeleka, mokwiidhipaga noondjembo notashi vulika okwiiyekela momeya, okunwa oopela nosho tuu, onkee taga tsikile.’Oshinima shika shomaidhipagomwene kwaakwashigwana mOshitopolwa shetu oshe tu etela omaipulo nomalimbililo omanene notatu ipula kutya oshike shi na okuningwa po, shi kelele omaidhipagomwene ngaka,’ Shisaande Iitumba ta ti nokugwedha po ta indile koshigwana shi tameke noonkundathana moshinima shika, kutya oshike tashi vulu okuningwa po opo kukalwe moshipala omaimangeleko ngoka, oshoka ngashiingeyi oshigwana otashi idhipaga po shoshene ko kwa mweniwa ashike, itaku popiwa ko itaku ningwa sha.Shisaande Iitumba ta ti omaidhipagomwene ngaka oge li unene mokati kaagundjuka yepipi lyokuza pomimvo 18 okuya pomimvo 35 noshowo ngaa maanona okuya pevi lyomimvo 18 naakuluntu okuza pomimvo 35. ‘Ondi wete oshigwana osha pumbwa okuningilwa iigongi, okupewa omauyelele nokulombwelwa kutya oshi na okuuka peni uuna shi na sha gwililwa po komaudhigu gi ili ngi ili. Onkatu yatya ngeyi oya pumbwa okukatukwa meendelelo ngashi tashi vulika manga oshigwana inashi imana po nokwiidhipaga po shoshene ngeyi,’ Shisaande Iitumba ta ti nokugandja omayele ngawo. Omathimbo ga zi ko, Pata Werner Afunde, ngoka e li Omupeha gwOmumbiishofi Omukuluntukuluntu gwOngeleka ya Katoolika ka Roma moNamibia,Omusimanekwa Liborius Ndumbukuti Nashenda, okwa shanga Embo ewanawa tali popi oshindji kombinga yomaidhipagomwene mokati koshigwana shaNamibia, unene tuu moNooli yoshilongo, konima sho a ningi omakonaakono ku ye mwene kutya omolwashike aantu tayi imangeleke nenge tayi idhipaga yoyene ethimbo alihe ngeyi. Momakonaakono ge okwa uvu mo omatompelo gamwe, ngoka tashi vulika ogo taga eta omaidhipagomwene ngeyi, nokwe ga shanga mEmbo lye ndika. Embo otali popi wo kutya oshike tashi vulu okuningwa po opo ku mwenekwe nenge ku shunithwe pevi omaidhipagomwene ngaka. Mboka ya lesha Embo ndika, otaya ti kutya ewanawa, otali gandja omauyelele ge li nawa otashi kala oshiwanawa aakwashigwana oyendji yi ilandele Embo ndika noku li lesha yi imonene mo omauyelele ogendji ge na sha nomaidhipagomwene ngaka moshigwana na nkene ku na okukembadhalwa, ku mwenekwe nenge ku shunithwe pevi omaidhipagomwene ngaka mokati koshigwana manga inaku toka. Embo, ndika lya etelwe puuyelele nokugandjwa li leshwe pambelewa meti 19 Febuluali nuumvo 2009 moUNAM mOvenduka, otali kosho N$50.00. Pata Afunde, ngoka wo a kala Omusita gwAakwiita ya Namibia ethimbo ele, oku na omaipulo omanene moshinima shika shokwiikutha oomwenyo mwene kwAanamibia noku li po nokuli a hala kuningwe oshigongi oshinene shi kundathane muule oshinima shika nokugandjwe omayele nomadhilaadhilo omawanawa kutya opu na okuningwa shike opo omaikuthoomwenyo mokati koshigwana sha Namibia kukalwe moshipala, ku mwenekwe nenge ku shunithwe pevi.