Omulandu gwokunyolitha oothigwa nagu talululwe.

OMALENGA moshitopolwa sha Ngela moshitopolwa sha Hangwena, ogi indile Ngoloneya yoshitopolwa shawo Usko Nghaamwa, a fale eindilo lyawo kEpangelo kutya omulandu gwokushingitha oothigwa opo dhi mone ooshali, nagu talululwe.

Omalenga eindilo ndika oye li ningi pethimbo ga li taga popithwa ku Ngoloneya Nghaamwa pOmungwelume moshitopolwa sha Hangwena mEtitatu lyoshiwike.
Eindilo ndika olya etwa koshipopiwa sha Nghaamwa, moka a li a indile omalenga ga konaakone aantu mboka haya tyapula uuwanawa wiimaliwa yooshali dhEpangelo omanga ooyene taya mono iihuna, opo ya katukilwe onkatu. Omalenga oga holola kutya oku na natango oothigwa odhindji dhili moshigwana tadhi mono iihuna koluhepo molwashoka dha tindwa nenge sha pula ethimbo ele omaindilo gadho inaga pita. Onkee omalenga ogi indile opo omulandu gwokupititha omaindilo gu kale hagu endelelithwa opo omukundu gwoluhepo gu kuthwe ko komapepe goshigwana. ‘Oto adha omuntu ta taamba iimaliwa yoothigwa, ashike oothigwa odhi li mOmungwelume omanga nakutaamba oshimaliwa e li kOshikango. Olundji oothigwa nenge mboka hayedhi tekula inaya tseya ngele opena gumwe ha tamba oshimaliwa shoothigwa dhoka, h Nghaamwa ta lombwele omalenga ngaaka. Okwa ti shika otashi eta oluhepo lu kale lwa kalela oshigwana molwashoka, mboka haya longitha oshimaliwa ohaye shi dhadhaputa owala omanga ooyene ye li ya kenyanana koluhepo nondjala. ‘Aakulupe oyendji ka yena oongaku, oohena nenge noosuuka oyo owala kaa ye shi. Oothigwa ka dhina oongaku noohema dhokOsikola omanga pena gumwe ta tyapula iimaliwa ineyi longela sha, h osho Nghaamwa a hokolola ngaaka ye tati shika oshina oku mona ehulilo. Shika hasho oshikando shotango aaleli yEpangelo taya nyana oshinima shika moshitopolwa. Kuyele omwedhi nguka, Kansela gwoshitopolwa shaShakatiuzilo Lot Kuushomwa okwa kondema woo oshinima shika, shoka iithana shaana ohenda yasha moshigwana nokwi indile iilema tayi hepekwa momukalo nguka yi lopote oshinima shika komalelo. ‘Oto adha iilema tayi hepekwa komazimo gayo yene. Ihaa yogwa, ihayi pitikwa ya kale paantu na niimaliwa yawo ohayi longithwapo kaantu yaa shi yo omanga yo yeli moluhepo, h Kuushomwa osho a popile ngaaka, pethimbo lyiitelekela yowina ya ningilwa aanuulema kelelo lyondoolopa yaShakati kuyele omwedhi nguka. Ngele omalenga oga yi mo oonyala moshinima shika, otashi ka eta owala elunduluko ngele opwa tulwa egeelo enene ku mboka taya ka monika ondjo mu shika.