Omukwaniilwa Mwandinomho a langeka Omalenga gane mOukwanyama

OMUKWANIILWA gwUukwanyama meekulu Martha Mwadinomho Kristian Nelumbu, mEtine lyoshiwike sha zi ko, okwa langeka omusamane Hangula Vatilifa mOshikandjo shUulenga sha Kelemba shoka sha kala tashi lelwa kElenga enene Lukas Shinedima uule wethimbo lya zi ko nokukoleka omalangeko gooyene yomikunda ye li yatatu,ano, tate Simon Moses, Elias Kashindinge Waandja noshowo tate Aron Shinana.

Tate Simon Moses okwa langekwa momukunda Oshalumbu mOshikandjo shUulenga sha Kongo mOukwanyama mOshitopolwa sha Hangwena, a yi pehala lya nakusa Lukas Heita, omusamane Elias Kashindinge Waandja momukunda Onandova namba wanu mOshikandjo shUulenga sha Kelemba, a yi pehala lyankusa Mathias Djulume na tate Aron Shinana momukunda Oshali mOshikandjo shUuleng sha Kongo, a yi pehala lya nakusa Abed Shinana.
Tate Waandja, Shinana na Moses, ngashi osho shi li pamulandu gwopamuthigululwakalo gwUukwanyama, oya adhika yahogololwa nenge ya ulikwa noya langekwa nale kIikandjo yawo hoka noya li ashike ya kolekelwa miilonga yawo yuulenga nenge yuuwenewomukunda kOmumwaniilwa meekulu Martha Mwadinomho Nelumbu mesiku ndyoka lyeti 16 Apilili 2009 pOhangwena pethimbo lyOmutumba gwElelo lyoshilongo, mewiliko lyOmukwaniilwa meekulu Mwadinomo Nelumbu.
Tashi ti elangeko lyElelnga enene lya Kelemba tatekulu Hangula noshowo lyooyene yomikunda oga ningilwe nale kIikandjo yawo nokOhangwena oge ya ko ashike ga kolekwe kOmukwaniilwa meekulu Nelumbu nokutameka nee iilonga yawo pambelewa ngawo.
Ayehe otaya ti kutya otaya ka longa nuudhiginini.
kEpeulo, kutya Elenga enene kwali lya Kelemba tatekulu Lukas Shinedima okwa ninga shike sho a kuthwa mo mUulenga wOshikandjo sha Kelemba nosha pewa tatekulu Hangula Vatilifa, Omunashipundi gwElelo lyUukwanyama tatekulu George Nelulu, pehala lyOmukwaniilwa meekulu Nelumbu, okwa ti kutya Elenga enene kwali lya Kelemba tatekulu Lukas Shinedima okwiimonekitha ondjo mewiliko lye ongElenga enene lya Kelemba.
A kala e na iipotha yoongombe dhAakwashigwana e dhi thigilwa ku mumwayina nakusa tatekulu Shinedima. Tatekulu Lukas Shinedima ta kala wo ita fala yOmukwaniilwa kOuhamba ano kOmbala ngashi hashi ningwa kOmalenga makwawo nokwa dhini wo okuvulika kElelo nokOmukwaniilwa, unene tuu a kala ite ya we kElelo i ipopile ngaa nande okuli, mwaashoka ta patanekelwa.
Omvula ya zi ko Elelo lyAukwan yama, omolwiinima mbyoka tayi popilwa tatekulu Lukas Shinedima, olya li lya kutha manga tatekulu Shinedima nguka miilonga, manga taku konaakoniwa iinima tayi mu popilwa. Omvula nee ndjika, olya tokola oku mu kutha mo miilonga nokulangeka omusamane Hangula Vatilifa pehala lye ongElenga enene lya Kelemba.
Hangula Vatilifa otaku tiwa kutya omonamati gwElenga enene kwali lyOshikandjo shoka sha Kelemba nakusa tatekulu Vatilifa Vaendwanawa ngoka a sile moshiponga shomboma pethimbo lyiita yekondjelomanguluko.