Omukunda gwAsab ta gu ya omwenyo

OMUKUNDA gwAsab moshitopolwa sha Hardap ota gu ya omwenyo ngashingeyi konima sho elelo lyoshitopolwa shoka lya tokola okuhwepopeka onkalamwenyo yaakalimo mpoka.

Omwedhi gwa ziko othe Namibian oya li ya hokolola kutya aakalimo yopomukunda ngoka oyuuvite nayi no ya li taya ti, ita ya ka hogolola ongula oshoka, ina ya mona uuwanawa nkene oshilongo sha mangulukile.Ehokololo ndika olya inyengitha aaningi yomatokolo, niigongi oya ningwa pokati koVenduka noMalinda, mpoka omapulo gapulwa kutya omolwashike pehala mpoka pwaana olusheno, omeya noshowo kutya omolwashike kaapena ehumokomeho pomukunda ngoka gu li popepi nondjila pokati koKaiti noMalinda.Ombedhi sho ehala ndika lyaana olusheno oya tulwa maapunguli mboka aniwa kaa yena eitulemo okupungula pomukunda ngoka.Omasiku ga ziko aantu yopAsab oya popi nothe Namibian oku topola onkundana ombwanawa kutya ota ya ka pewa olusheno, konima sho aanambelewa ya talelepo ehala ndyoka okuthaneka mpoka tapa tulwa omalusheno.Olusheno ita lu tulwa ashike mpoka ndele ota lu falwa woo koofaalama ndhoka dhi li momudhingoloko ngaashi ndjoka ya Amalia, osho ya lombwele othe Namibian.Aanambelewa melelelo lyoshitopolwa sha Hardap ka ya li ya hala okutya sha kombinga yomalongekidho ngoka ta ya ningi mehumokomeho lyomukunda nguka.Nonando ongaaka elelo olya li lya ningi etseyitho miifo ta li kongo aanangeshefa mboka ya hala oku humitha komeho oshitopolwa shimwe poAsab.Oya hala okwoopaleka oshitaasi shomahooli, ositola, nohotela ndjoka ya kulupa.Ohotela oya pilepo pamukalo inaa gu vula okufatululwa konima yomimvo ndatu omanga ya li mewiliko lyomugavena gwa Karas nale omusamane Stephanus Goliath ya li ta ya longo pamwe na gavena gwongashingeyi gwa Karas Dawid Boois.Pakaalita ka Namibia, oshitaasi shomahooli natango otashi ulikwa tashi longo ndele paushili ootenga dhomahooli odhili owala oku za petameko lyomvula ndjika, sho mwene gwehala ndika a li a nyengwa oku itaalitha Uuministeli Womagumbo Niilando wu ete olusheno pomukunda ngoka.Patseyitho ndyoka lya ningwa kelelo lyoshitopolwa sha Hardap ota ku tiwa ehangano lya Nampower ota li tula olusheno pomukunda gwa Asab.Esiku lya hugunina lyokugandja omathaneko goongeshefa olyo 18 ga Desemba 2009. Elelo lyoshitopolwa sha Hardap olya tula po ehala lyomauyelele pomukunda ngoka. Ehala ndika ina li pwa natango okutungwa, naakwashigwana yaampoka ka ye na omukumo kombinga yalyo oshoka kape omeya nolusheno.Elelo lyoshitopolwa sha Hardap olyiitaala kutya ehala ndika lili pooha dhondjila onene yokuya koKeetmanshoop oli li nawa naatalelipo mboka ta ya ende oku za noku ya ko South Africa.