Omukunda Etegameno gwa egulula okapangelo kagwo

EHALA lyEtegameno moGreenwell Matongo moVenduka opwa egululwa okapangelo kedhina Kalahari Sands Clinic. Ehala lyEtegameno oli na okapangelo, noshowo ehala mpoka hapa kala uunona noshowo mboka ta ya pumbwa esiloshimpwiyu molwaashoka ota ya ehama noye li pokutopoka nuuyuni mbuka. Pehala mpaka aakuluntu naanona mboka ya gumwa nenge taya lumbu nombuto yo HIV/AIDS oye li monkalamwenyo pamwe na, ina ya pumbwa oku sa ye li muuwike.

Okapangelo haka ka tungwa momumvo 2007 opo ashike ka shangithwa nUuministeli Wuundjolowele ongo okapangelo.Okapangelo okaakuluntu nuunona mboka wu li pehala lyEtegameno noshowo mboka ye li momudhingoloko ngoka.Konyala aakiintu 209 ye na uunona oha ya pewa iikulya lwaali moshiwike okuza kehangano lyedhina Pharm Access ta shi pitile mokapangelo haka.Omundohotola gwomayego, gwomeho noshowo omuthuli gwolutu oha ya talelepo okapangelo opo ya kwathele nokuyakula aantu yomomudhingoloko gwa Greenwell Matongo, Goreangab, Havana no shitopolwa sha Kabila.’Omayalulo goshigwana gomumvo 2001 oga ulikile kutya oshilongo oshina oothigwa omayuvi 156 165 kohi yomimvo 20 noshowo dhi li pomayovi 97 000 dhi li poomvula 15.Otaku tengenekwa kutya momumvo 2021 Namibia ota ka kala ena oothigwa 250 000 ndhoka ta dhi kala ooperesenda 10 dhoshigwana ashihe sha Namibia,pahapu dhoMinista Yuukakwashike kookantu nonkalo nawa yuunona, Marlene Mungunda, sho a popi pethimbo lye egululo lyokapangelo haka.Momumvo 2004 iititatu iyali yoothigwa adhihe dha Namibia, odha ningwa oothigwa molwa uuvu woAIDS.Pamiyalu ndhoka dha gandjwa kUuministeli Wuundjolowele, otadhi ulike kutya aantu yevule 200 000 moNamibia ota ya lumbu nombuto yoHIV.Kalahari Sands oye a futile etungo lyokapangelo haka noshowo okwa gandja oombete, iikwapundi, iilongitho yomokombitha noshowo komagumbo ngaka gatatu. Omagumbo ngaka gatatu ogaanona yaamati, yaakadhona noshowo lyuunona uushona, taga sile oshimpwiyu aanona ayehe kumwe 74.