Omukulupe a pila megumbo moSikai mOshakati

OMUKULUPE gwoomvula gwoomvula [79] kwali kuku, Anna Israel, a tseyika wo nawa nedhina Gwamupolo, okwa si eso lyombaadhilila sho a pile mondunda ye yokulala ongulohi yEtine lyoshiwike sha zi ko molukanda lwa Sikai mOshakati mOshitopolwa sha Shana.

Egumbo otaku tiwa kutya olya meme Jacobina Uupindi. Omukulupe, ano nakusa Gwamupolo, otaku tiwa kutya megumbo lya meme Uupindi okwe yile mo a za kegumbo lye mOsikai tuu moka, konima sho egumbo lye lya yi kohi yomeya gomvula ya lokele mOshakati omasiku ga zi ko.Kutya naanaa oshike sha eta omulilo, kashi shiwike kwali nOpolisi oya kala tayi shi konaakona. Yamwe oya li taya ti kutya meme gwomugundjuka, a li ha lala kombinga yimwe yegumbo ndyoka, otashi vulika a thigile okalehite ka tema noka eta omulilo ngoka. Shika oshikando oshitiyali egumbo ta li pi mOshakati konima sho kwa lopotelwe wo natango egumbo lya tate Mutaleni Sakarias mOneshila lya pya po thiluthilu komulilo, ngoka gwa kala kagu shiwike wo nago kutya ogwa zi peni nogwa etwa koshike naanaa. Egumbo alihe niinima ayihe oya pila mo na meme Aune Leonard, gumwe gwoonakukala megumbo moka, ota ti kutya inaya thigwa po nasha, shapo oonguyo ndhoka ya li ya zala pethimbo ndyoka. Meme Aune ta ti otaya indile kaasihenda ye ya kwathe muupyakadhi wawo mbuka wa etwa komulilo nguka.Aune ta ti kehe ngoka wa tokola oku ya kwathela, oto vulu okuninga ekwatathano naye kongodhi ye yonomola ndjika;0813304225.Opolisi mOshana onkee tayi kunkilile aakalimo ya kale ya takamitha omililo momagumbo. Tayi ti aantu kaya thige uulehita wa tema nenge yaa thige uunona nenge aanona oyo ayeke momagumbo mu na omililo nenge uupalwa nuulehite. Unene tuu ngashi uutalala we ya ngeyi nenge tau ya ngeyi, omililo otadhi ka fika nokudhipaga aantu moNooli ya Namibia.