Omukulupe a dhipagwa komona nekatana

OMUKULUPE gwoomvula 110 gwomomukunda Omukwiyu, mUukolonkadhi mOshitopolwa sha Musati, kuku Shaningwa Shikodhi, okwa si eso li nyanyaleka sho a hahalwa nekatana komonamati gwoomvula omilongontano (50) nokusa, sha ningwa ongulohi yOmaandaha ga zi ko.

Komanda gwOpolisi mOshitopolwa sha Musati, Komufala gwOpolisi Simion Shindinge, okwa lombwela The Namibian kutya Opolisi ye oya kwata po omulumentu gwoomvula omilongontano gwedhina Leonard Shikange, shi na sha nedhipago lya kuku Shikodhi. Komufala Shindinge ta ti, omulumentu nguka okwa fa omukambelindunge. Taku hokololwa kutya ongulohi yOmaandaha ga zi ko ndjoka, nakufekelwa nguka okwa kutha ekatana nokuhahala omukulupe momutse nokwa si. Okuza mpoka okwa pilukile maanegumbo noku ya tidhaatidha a hala oku ya hahala nayo nekatana.Opolisi sho ya lopotelwa oshiningwanima shika, oya endelele nokuya pegumbo mpoka. Ashike nayo sho ya thiki po, Shikange okwa tameke oku yi ponokela nekatana. Opolisi inayi ikwata, oye mu umbu noye mu yaha komagulu agehe gaali nokwa gwile po nokukwatwa nee nawa kOpolisi. Otaku tiwa kutya Shikange pethimbo ndika oku li ta mono epango moshipangelo shEpangelo sha Shakati. Opolisi otayi konaakona oshiningwanima shika nkene sha ende.Pokati mpoka otwa kundana wo kutya omulumentu gumwe gwomutiligane, okwa si eso lyombaadhilila, aniwa sho a nuka koshungo yomeya mOndangwa. Opolisi otayi konaakona oshiningwanima shika, unene okutala kutya nakusa okwiidhipaga nenge koshungo hoka okwa gu ko ngiini. Opolisi ya Shivelo otayi konaakona wo aniwa oshiponga sheso, shomulumentu gwoomvula inadhi shiwika natango, a si ombaadhilila sho a topelwa kOndoloma yomahooli, ndjoka ya adhika aniwa taya kutha mevi pOngalashe yOmahooli ya Caltex pOshivelo mpoka, sha ningilwe omutenya gwEtiyali ndika lya zi ko.