Omukulunhu wetanga leameno ota futifa kamusela woIPC oshimaliwa shi fike poN$500 000

Kakukutu komatanga wetanga leameno laNamibia ledina Namibia Defence Force (NDF) Martin Pinehas ota futifa kamusela wongudu yoIndependent Patriots for Change eshi a kakeka oukwataya waye.

Pinehas ota pula oshimaliwa shi fike poN$500 000 kukamusela wokOmuthiya Nghipudilo ya Shiindi molwomapopyo oo a ninga komalungula.
Ya Shiindi,vati okwa lundila Pinehas kutya oku na ondunge yomeholamo yokumonifa oshiponga pelesidente woIPC Panduleni Itula.

Omikanda odo da yandjwa kuhahende waPinehas, Sisa Namandje oda ti, omapopyo aYa Shiindi, oo kwa li a ningwa momafiku 29 Novemba odula ya dja ko, okwa li aandjakana nomapandja okomalungula a yooloka.

Pinehas okwa ti omapopyo oo mwa kwatelwa omalundilo kutya Pinehas okwa li a ninga oshoongalele kokamba yovakwaita koGootfontein momafiku 27 Novemba 2024, efiku olo Ovanamibia va kufa ombinga momahoololo oo taa nyenyetwa paife oupelesidente nomutumba wopashiwana, opo a longekide okweehameka ile okudipaya Itula.

Omapopyo aYa Shiindi a fatululwa, oo a kwatelwa momukanda waPinehas oo wa yandjwa komhangu, aa ti ngaha: “Otwa vakelwa ko koshoongalele oko, ndee ohatu ti: Ngee oshinima oshonumba osha ningilwa pelesidente oo te ya, Dr Panduleni Itula, oto ka nyamukula oshinima eshi.

“Eemangela doye otu di shi . . . inoshi ningila owina . . .shaashi ei o2024, ndee vakwetu nyee otamu kendabala okushitamena ombili nelandulafano olo hamu uhala tamu udifa.”

Pinehas okwa ti omapopyo aa okwa li oipupulu yongaho notaa nyateke, a hala kutya oha longifa ombelewa yaye ongomukulunhu wetanga leameno moinima yopolitika nokulonga oimbuluma, mwa kwatelwa okutula eemwenyo dovakwashiwana moshiponga.

Natango omukanda wokomhangu otau ti omapopyo aYa Shiindi otaa ti Pinehas okwa li ta longifa NDF opo a lemaneke Itula, shaashi oku li moinima tai piyaaneke ombili moNamibia, yee ina fimaneka oveta.

Okwa ti omapopyo aa okwa li ashike a ningwa nelalakano lokumona oitwa yopolitika. Onghee nee Pinehas, ota pula oshimaliwa shi fike poN$500 000 molwekakeko loukwatya, eteyo lefimano nosho yo okukakeka ondjokonona yaye.

Pakuweda po koshimaliwa eshi, ota kongo omukandaano tau di komhangu tau popi kutya omapopyo aYa Shiindi ka eshi oshili.
Ota pula yoo vali a pewe ombili.

Namandje okwa yandja omukanda ou komhangu momafiku 16 Januali.

Hahende waYa Shindi, Dirk Conradie, okwa yandja elombwelo kutya okwa hala okukondjifa oshinima eshi Omaandaxa a dja ko.Oshoongalele shi na sha noshibofa eshi otashi ka ningwa momafiku 12 Febuluali.

OKWA YANDJA NALE OMBILI
Ashike nee, Ya Shiindi okwa yandja nale ombili moshiwana kuPinehas mokavidio kokoTik Tok momafiku 29 Novemba, ta ti oinima oyo e mu popila kai li mondjila noya ehameka Pinehas.

Ohandi yandje ombili kuye, Martin Kambulu Pinehas, kwaasho ashishe sha etwa kwaashi, Ondi udite kutya onda popya oinima ei ashike okwa li nda pewa ouyelele wa puka, nohandi kalele po oshinima eshi mwene,” Ya Shindi osho a ti ngahjo mokavido kaxupi.

Eemhangu daNamibia oda kala nokwaamena ovanamadina ovo va kala nokuya kudo shi na nomapopyo a ningwa komalungula.

MuDesmba odula ya dja ko, omhangu yopombada okwa li ya pula omupangi eli moshipundi shetulumuko Mathilide Kadhikwa opo a fute omunangeshefa Shapwa Kanyama nomukulukadi waye Beata oshimaliwa shi fike poN$130 000 eshi e va popila oinima ya puka, nosho yo oimaliwa oyo va longifa movakalelipo vopaveta i fike poN$643 000.

Momudo 2021, omukulukadi waKanyama okwa li a futifa omupopiliko wongudu yoIPC Imms Nashinge oimaliwa i fike poN$400 000 moshibofa shekakeko loukwatya.

Nashinge okwa li a itavela okufuta oshimaliwa shi fike poN$60 000 molwekakeko loukwatya nedina laBeata.
Momudo 2022, omunyekadi woshilongo mukulu Monica Geingos okwa li a findana po oshibofa osho kwa li a tulila mo omulongifikola wokOhangwena Abed Hishoono.

MuAuguste odula ya dja ko, omupedu minista woimaliwa Maureen Hinda okwa li a findana po oshibofa osho kwa li a tulila mo omuleli wongudu yoAffirmative Repositioning Job Amupanda, oo kwa li a pulwa a fute Hinda oshimaliwa shi fike poN$100 000.
Omhangu yopombada pefimbo opo nayo okwa li ya pula Amupanda opo a fute oshimaliwa shovakalelipo vopaveta vaHinda.