Omukokolipresidende otaka ninga oshigongi oshinene kOhangwena

ONKUNDANA ye tu zilila kOmbelewa yOmukuluntu gwoSwapo mOshitopolwa sha
Hangwena, ano ya tate Nestor Shuukwanyama, otayi ti kutya Omukokoliperesidende tatekulu Sam Nujoma mOlyomakaya ngaka twa thinda geti 23 Mei 2009 otaka popitha oshigongi oshinene shoSwapo pOhangwena moshitopolwa sha Hangwena, tashi ka tameka poyimwe yomutenya.

Omusamane Nestor Shuukwanyama, ta lombwele The Namibian kutya, oshigongi shoka oshinene otashi ka tamekwa nomaashinga onene okuza kOnhuno nOshikango okuya kEtala lya Hangwena hoka taku ka kala onee shigongi shika oshinene tashi ka popithwa kuhe yoshigwana.’Aakwaswapo amuhe otamu hiywa kOshigongi sheni shika oshinene nosha simana. ‘Ileni momangungo omanene,’ Shuukwanyama ta ti. Oongundu dhOopolotika, unene Oswapo noRDP, pethimbo ndika odhi li tadhi ningi iigongi yadho iinene mUumbangalantu woshilongo nosho tuu, kehe yimwe tayi indile koshigwana shi ke yi hogolole momahogololo ngoka twa thinda taga ka kala ko mu Novemba nuumvo moka tamu ka hogololwa Omupresidende gwoshilongo noshowo iilyo yOmutumba gwOpashigwana. Nonando Oongundu ndhika mbali odho unene tadhi monika dhi ipyakidhila noonkondo okuningila aakalimo yokonooli nosho tuu iigongi, osha yela kutya noonkwawo wo, unene ndhoka tadhi ka kutha ombinga momahogololo ngaka, opo ngaa tadhi ka mbanduka ko ngiika. Oshinima ontsi otayi tameke nee okutsima, noshigwana nashi kale shi ilongekidha okupulakena kaaleli yasho kutya oya hala ye ke shi ningile shike muule wethimbo twa thinda.