Omukokoliperesidende a popitha engathithi lyAakwaSwapo pOutapi

OMUKOKOLIPRESIDENDE mOsoondaha ya zi ko okwa popitha engathithi lyAakwaSwapo noku ya indila ya ka hogolole mEtitano nomOlyomakaya gOshiwike shika.

Omukokolipresidende ta ti natango oshigwana sha Namibia otashi pewa ompito shi longithe uudemokoli washo noshihogolole Omupresidende nIilyo yOshigongi shOpashigwana. Okwa endulula ta ti Oswapo oyo ya mangulula Namibia nokupangela uule woomvula omilongombali dha zi ko, onkee oshigwana natango otashi indilwa shi shune Oswapo koshipundi ngashi naana sha kala tashi shi ningi molweendo lwoomvula ndhoka 20 dha zi ko. Omundohotola Nujoma ta pandula aakwati yoohi mboka haya longo momeya okuzilila kOmbaye nokOlindili sho ya hogolola nawa. Ta ti oya gandja oshiholelwa oshiwanawa kaaNamibia ayehe ya hogolele Oswapo. Okwa kumike aahogololi ya ka hogolole nombili . Omukokoli peresidende ta ti ngawo nokutsikila ko ta ti natango kutya Swapo oye a lwila emanguluko lyoshilongo noshigwana sha mo. Ta ti emanguluko inali za pokapala kayela nande.Omukokolipresidende ta ti, Epangelo lyOswapo olya tunga oondjila, Olutenda, okuza kOshomeya sigo okOshikango okupitila mOndangwa, lya tunga Oosikola, Iipangelo nOoklinika, lya tungila oshigwana omagumbo nolya gandja omeya nolusheno koshigwana sha Namibia. Omukokolipresidende ta indile kaavali nokaakuluntu ayehe ya tume aanona yawo kOsikola. Ta ti okuza tuu sho omunona ta gwanitha oomvula ndatu, na tumwe kOkinda, naya longwe iilongwa yopaunongononi, yOmwaalu, Ookoompiuta nosho tuu. Yo taye kiilonga Uuwindjinia kIiputudhilo yopombanda yUuwindjinia ngashi shoka sha Ngwediva nosho tuu. Omundohotola Nujoma ngoka wo e li Omukuluntu gwa UNAM, ta ti omvula tayi ya moUNAM otamu ka tulwa Oshitayi shokwiilonga uunamiti, moka tamu ka longwa oondohotola dha Namibia. Ta ti Namibia oshilongo shi na uuyamba oundji wiikwamina mbyoka ya pumbwa ashike okulongwa mo nokugandja eliko koshigwana. Ta ti ngashi Ourana ndjoka yi li mo Namibia oyindji lela, Namibia ota vulu oku ke yi longitha mokuninga olusheno noshowo okuningulula omeya gomefuta ga kale omaanawa notaga vulu okulongithwa okunuwa nosho tuu, na Namibia itaka longitha nande esiku limwe Ourana ndjoka mokushita oomboma ngashi tashi ningwa kOmaiperiale mokulwitha mboka ye li kiilongo yimwe muuzilo wa Asia. Ta ti Ourana ya Namibia oyo ku shita iinima yi na sha nokuhumitha komeho Namibia noshigwana she. Omukokolipresidende ta indile nee koshigwana sha Namibia, a manamo kutya nashi hogolole Oswapo nOmupresidende gwayo Hifikepunye Pohamba momahogololo ngoka taga ka kala ko oshiwike shi opo yi tsikile nOprograma yayo yokuyambula po Namibia noshigwana.