Omukithi gwOkolela mu Kunene gwa yiwa moshipala

EPANGELO olya popi kutya olya ya moshipala omukithi gwOkolela moshitopolwa sha Kunene, ngoka gwa dhipaga aantu ye li yatatu.

Amushanga omukuluntu mUuministeli wUundjolowele nOnkalathano Kahijoro Kahuure okwa ti ina ku lopotwa we omaso gaantu komukithi nguka konima sho omukithi nguka gwa lopotwa moshitopolwa shika.
Kahuure okwa ti opwa li ngaa aantu yaali (moshitopolwa) ya li ya kwatwa koshimela sha yula, ihe ina shi kolekwa kutya oya kwatwa komukithi nguka.
Okolela ndjika kayi na aniewa ekwatathano naandjoka ya lopotwa mu Zimbabwe, Angola, South Afrika na Zambia mu Desemba gwomumvo gwa zi ko.Omukithi nguka ogwa lopotwa unene pomukunda Okanguati gu li moshikandjohololo sha Epupa.
Kahuure okwa ti yo oya ninga omakonakono gomuule kombinga yomukithi nguka na osha monika mo kutya ogwe etwa kompumbwe yomeya gokunwa ga yela naandjoka yuundjugo.
Uuministeli owa li wa tumu osipana koshitopolwa shika yi ka konakone kutya oshike sha eta omukithi nguka.
Kahuure okwa ti Uuministeli wawo owa li wa indile omakwathelo kOoministri dhilwe molwashoka, ita u vulu okuungaunga nomukithi nguka oo awike.
Iiwike iyali ya poti po, Uuministeli mbuka owa li wa tseyitha kutya owu li komalwilo okukelela omukirthi gwOkolela konima sho pwa holoka oolopota kutya omukithi nguka mu Zimbabwe ogwa thika kiishiindalongo ye ngashi Zambia, Botswana na South Afrika.
Omadhidhiliko omanene gOkolela ogo ngaka kutya omuntu oha kwatwa komela sha yula. Ngele nee ina pangwa, omuntu oha vulu okusa muule woowili 24.
Gamwe ogo epunda lya pama, shoka hashi etwa komeya inaga yela nenge konkalo yokwiikwathela miihwa, shoka eta nee oshimela.
Mu Mei nuumvo, Epangelo olya li lya thiminikwa okupata Oprimasikola pOkanguati, konima sho aalongisikola yaali ya kwatwa komukithi nguka.
Pethimbo ndyoka, aalntu ye li 15 lwaampoka oya li ya si komukithi nguka moshitopolwa sha Kunene omanga ya konda po 2 000 kwa li taku fekelwa ya kwatwa kOkolela na ye li 10 yomuyo, oya li ya monika lela omukithi nguka.