OMUKIINTU gumwe gwomwAangola okwa kwatwa po pOkapela koondhila pOmbaye sho a adhika noopela dhOkokeina dhi li 95.
Opolisi moshitopolwa sha Erongo oya ti kutya omukiintu nguka okwa kwatwa po oshiwike sha zi ko.Omukiintu nguka okwa li aniwa a pona oopela dhi li 50 dhomoopela dhika, omanga dhi li 45 a li e dhi holeke mondjato.
Otaku popiwa kutya okokeina ndjika oyi na ongushu yoshimaliwa shOondola/N$600 000.
Omukiintu nguka oye Irene da Costa (gwoomvula 32), na okwa a londo ondhila pokapale haka okuya ku Brazil, okupitila mu Johannessburg momasiku 19 ga Mei.
Mokugaluka kwe okwa li natango a longitha ondjila ndika na pOmbaye okwa li a thiki po momasiku 27 Mei, moka omo nee a li a katwa po kOpolisi sho oondjato dhe dha hadhwa.
Omugandjimulombo gwOpolisi moshitopolwa sha Erongo, Julia Nujoma, okwa ti sho nee Da Costa a kwatwa po, okwa li a falwa kOshipangelo shEpangelo pOmbaye, hoka a li a ka kuthwa okokeina ndjoka a pona.
Moshipangelo okwa kala mo omasiku gaali manga ina holoka mOmpangu ya Mengestrata oshiwike shika.
Oshipotha she oshuundulilwa komasiku 9 ga June, opo natango ku ningwe omakonaakono.
Da Costa ina pewa ombooloha.
Okupona oopela dhokokeina oshinima sha nika oshiponga molwashoka otashi vulika dhi topele mepunda, shoka tashi vulu okweeta eso.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
