Omukiintu gwomoSwakopo a kengelelwa oshimaliwa she shuuthiga

Omukiintu ngoka hazi moSwakopo otaku hokololwa a kanitha oshimaliwa she shooN$500 000 sho taku hokololwa e shi kengelelwa okuziilila momayalulo ge gombaanga, omasiku ga zi ko.

Pauyelele wa gandjwa molopota yopolisi yaSwakopo, sigo oompaka kapu na shoka sha monika po opo nakuninga oshihakanwa a galulilwe oshimaliwa she.

Oshiningwanima shoka osha ningwa ethimbo lyongula momasiku 13 Mei, poTreff Plaza.

Pauyelele wopolisi, nakuninga oshihakanwa okwa gwile momake omawinayi gokukengelelwa sho nakumukengelela a longitha edhina lyomunambelewa gwomombaanga yokoAmerika yedhina Cottage Trust Bank.

Omukengeleli ngoka otaku hokololwa tango a kwatathana nomukiintu ngoka paemail, nokwe mu lombwele a lundululile oshimaliwa she shuuthiga okuza mombaanga ye yoBank Windhoek ye shi tumine koshiketha shomoCottage Trust Bank.

Omanga ta dhengwa mokatoo, omukiintu ngoka okwa tuminwa oonomola dhontumba ndhoka e na okulongitha opo a lundulule oshimaliwa she nokwa lombwelwa wo kutya nafute oshimaliwa shontumba opo a vule okumona oshimaliwa she. Sho a landula omalombwelo ngoka, okwa tameke okufuta nenge okulundula oshimaliwa she ta longitha oonomola ndhoka a pewa.

Okuza mpoka, omukengeleli otaku hokololwa a ndjondjo mo oshimaliwa ashihe momayalulo gombaanga yomukiintu ngoka.
“Nonande omakonakono otaga pula komeho, kapu na ngoka a tulwa miipandeko sigo oompaka,” osho omupopiliko gwopolisi moshilongo, omupevikomufala Kauna Shikwambi, a popi ngaaka.

Shikwambi okwi indile oshigwana ashihe shi kale sha lungama nokudhengela oombaanga dhawo uuna ya dhimbulula pu na omakwatathano naantu taya limbilike shi na sha niimaliwa yawo nenge iifuta ya sha yopambaanga.

Omasiku ga zi ko okwa ningwa oshigongipukululo shiilyolongo yongongahangano yokuumbugantu yoSouthern African Development Community (SADC) moSwakopo, okuyelithila onkalo yokatoo hoka taka indjipala, osho wo omakengelelo giifuta yopamalungula, nokwa li ya popi nkene oonkalo ndhoka dha guma onkalathano, opolitika osho wo iikondo yiimaliwa.