Omukiintu gumwe mOutapi a hepekwa komulume

OMUKIINTU gwoomimvo [34], Beatha Jonas gwomOlukanda lwa Tobias Hainyeko mOnhimbu mOutapi okwa si eso li nyanyaleka okupendukila Osoondaha yeti 26 Desemba 2010 sho a ponokelwa komulume nenge kohonda ye, Kondjeni Johannes Daniel[35] mondunda ye yokulala moTobias Hainyeko moka, te mu tete lwaali nekatana kothingo nokokooko kumwe noshowo te mu tsu oombele dhi vulithe pomulongo olutu aluhe nokufadhuka ka po.

Omupopiliko gwOpolisi mOshitopolwa sha Musati Shisaande Heskiel Hamalwa okwa lombwele The Namibian Omaandaha ga zi ko pOutapi kutya omulumentu ta popiwa nota fekelelwa edhipago lya Beatha, gwedhina Kondjeni Johannes Daniel , oye mu kwata po meti 31 Desemba 2010, ye mu kwatele komweelo gwokoongamba gwa Shikango, mOshitopolwa sha Hangwena.Shisaande Hamalwa ota ti, oshi li ngeyi kutya sho ya ithanwa ya katale iihuna mbyoka yalongelwa, Beatha komufekelwa Kondjeni, oya dhimbulula kutya, konima sho omufekelwa a dhipaga Beatha ngawo, manga ina fadhuka po okwa kutha omahooli goindjina, tega shashamine mondunda ayihe moka mwa li mwa lala Beatha a sa nale, ngiika e shi ningi nedhilaadhilo lyokufika po olutu lwe, opo kutiwe ngeno kutya, okwa pila mo. ‘Edhilaadhilo lye ndyoka inali kapita, oshoka ina mona okapalwa e ka tsamake nokutomeka ondunda moka a dhipagele Beatha, nokwa fadhuka po noku ka holama kOshikango hoka twe mu adha,’ Shisaande Hamalwa ta ti ngawo nokugwedha po ta ti shimwe wo ya dhidhilike pomudhimba gwa Beatha mpoka, opendi ye yi adha ya tetwa mo kokugulu kumwe, shoka tashi vulika kutya nguka okwa kwata Beatha koonkondo manga ine mu dhipaga. Shisaande Hamalwa ta ti Kondjeni, ngoka a holoka mOmpangu ya Mangestrata pOutapi Omaandaha goshiwike shika, okwa patululilwa oshipotha shedhipago, shekwatonkonga noshowo shonkembadhala yeyonagulo lyomudhimba nonkembadhala yokuholeka uushili koveta. Ina pulwa manga a tye sha kombinga yoshipotha she shika noshuundulilwa keti 21 Februari 2011 omolu omakonaakono gOpolisi nomalongekidho wo galwe giinima ya pamba Ooveta nOompangu.Omumwayinakadhona, Hilma Kanghondi, ngoka a lulilwa, a kankwa nokwa haluka kedhipago lya Beatha, ota ti Kondjeni ke na uunona na nakusa Beatha. Ta ti oya adhika opo ashike ya panga uukuume wawo mboka, pwa pita ashike oomwedhi ngele odhindji ne nenge ntano. Hilma ta yelitha ta ti, nakusa Beatha okwa adhika e na aanona yane, aamati yatatu nokakadhona kamwe. Ta ti opo ya kala pu yina mo Tobias Hainyeko moka, ashike nee sho yina a dhipagwa ngeyi, oya adhika ya yi kuyinakulu Fatima Asser, kOiputa kOmbadja ko Angola, hoka oko kwa kala meekulu Fatima ngashingeyi, sho a zi pOmulunga mo Namibia, mpoka opo ya kala shito. ‘ Oshike ano shi li momadhilaadhilo gaalumentu Aanamibia yakwetu, sho taya uhala ashike taya dhipaga oomeme naanona, nenge taye ya lala koonkondo noku ya ningila omauwinayi agehe? Oomeme ano otwa ninga shike? Hilma ta pula ngawo nokwiindila kEpangelo kutya inali etha nande aantu mbaka ya ze mo mondholongo noye ye ishewe ya kale taya ende nombili mokati koshigwana. ‘Epangelo nali tale po nawa mpoka, kapu li nawa, naalumentu Aanamibia nayi ipule nawa kutya otaya ningi shike shoka. Hekulu gwa nakusa Beatha, Matheus Sakaria, okwa lombwela The Namibian poshigumbo sha Beatha mOnhimbu mOutapi mpoka kutya aakwanezimo aakuluntu otaya ka kaatumbila oshiningwanima shika noku shi kundathana muule. Ta ti nande ongawo yo oyi inekela mOoveta nomomalandulathano goshilongo mokutala iipotha yoludhi nduka paeveta dhopashinanena, ngashi ha kutiwa, noshowo oku yi tala paeveta nopamikalo dhopamithigululwakalo. Shika oshikando oshititatu muule woomwedhi mbali mOshitopolwa shoka kwali hashi ithanwa nale Owambo, tamu dhipagwa omukiintu komulumentu taku tiwa kutya omuholike gwe. Meti 20 Novemba 2010, okakadhona koomvula 18 kokanasikola kOseko yUukule kedhina Sarah Heita oka dhipagelwa mondunda yomalandithilo pOnamulunga mOndonga mOshitopolwa sha Shikoto sho ka tetwa omuligu nombele komulumentu gwoomvula 25, ngoka taku tiwa oye Andreas Shivute Kalapi Shangemwene gwokOmolo kOmbalantu. Okwa kwatwa po nale kOpolisi nokwa holoka mOmpangu pOndangwa. Omukadhona gwoomvula omilongombali nasha gwomUuthilindindi mUukwambi mOshitopolwa sha Shana okwa si sho a dhengwa nomupini gwetemo momutse komuholike gwako, Paulus Thomas Iipinge gwoomvula 26, sha ningilwe meti 28 Novemba 2010.