Omuhingi ta pangulilwa epumo lyo sheenditho molweendo

OMUHINGI gweshete eluudhe ndyoka lyi idhengele mosheenditho shopolisi manga sha li tashi kutha iiyenditho kondjila popepi noSwakopmund omumvo gwayi , ota ka holoka mompangu yamengestrata ya Walvisbay.

Omuhingi nguka ota ka tamanekelwa okuhinga nuuhasha, sho idhenge mosheenditho shopolisi shoka sha li tashi opaleke ondjila opo osheendo shomuperesidende Hifikepunje Pohamba shi pitepo.
Albertine Povanhu[27] okwa tegelelwa a pewe etseyitho kutya oku na okuholoka mompangu, konima sho omutamaneki ndjayi a tokola kutya nguka oku na oku tamanekwa.
Oshiningwanima shika osha ningilwe metitatu omasiku 28 ga Kotoba 2009, mondjila yokomunkulofuta pokati koSwakopmund no Walvisbay. Povanhu nomumwayinakadhona nakuume kawo oya li mondjila ya thinda ko Swakopmund ta ya ka pula pulwa molwa iilonga. Pethimbo olyo tuu ndyoka osheendo shomuperesidende Hifikepunje Pohamba nasho osha li mondjila shuuka koshidhindhitho shomeya gomefuta sha Areva popepi na Wlotzkasbaken.
Osheenditho shopolisi shoku opaleka ondjila opo omuperesidende eendepo, tashi hingwa komutaleli omukuluntu, Tobias Gerber aniwa osha hingi pooha neshete lya Povanhu, noku mu lombwela kutya na zeko kondjila, sho oshiponga sha holoka.
Eidhengo mumwe lyiiyenditho mbika iyali olya eta mpoka kutya mbika oya teya po iitenda mbyoka ya gamena iiyenditho kaa yi gwile momeya, pooha dhefuta ha pu ithanwa omunkulo gwo Boere, konyala ookilometa heyali oku ya moSwakopmund. Iiyenditho mbika oya gwile popepi nomeya mpoka ha pu hulile omeya gefuta uuna lya pindjala, moshiponga shika ina mu ehamekelwa omuntu.
Ota ku hokololwa kutya sho osheen ditho sha Povanhu sha pitilile ololi ya li ta yi ende kashona, nookena ontseyo yosheendo sha peresidende, Gerber na ye aniwa okwa pitilile ololi ndjoka nokwa hingi popepi neshete lya Povanhu noku mu indila a zeko kongalama.
Ota ku hokololwa ishewe kutya Povanhu aniwa sho a mono osheenditho shopolisi popepi noshe okwa haluka noonkondo nomokwaashiwo okwa goyola osheenditho she shuka mwaashoka shopolisi.
Moonkundatha ndhoka Povanhu a ningile noThe Namibian okwa tile ye okwa li ta hingile kondapo ndjoka yuuthwa, na ishewe ina mona nando endhindhiliko kutya omuperesidende nosheendo she ota ya longitha ondjila ndjoka, na ishewe ina mona osheenditho shopolisi konima ye tashi tema omalamba gasho oku londodha kutya ota ku zi omukwakuluntu. Esiku lyokuholoka kwe mompangu olya li inaa li tseyika natango sho oshinyolwa shika sha nyanyangidhwa.