Omuhingi gwOloli yOpoosa mOshakati a kwatwa po ta fekelwa uufuthi

OPOLISI ya Ndangwa nOshakati mOshitopolwa sha Shana oya kwata po omulumentu, omuhingi gwOloli yOpoosa ndjoka hayi fala iinima yOokastoma dhopoosa, ano Opoosa kuushimba, unene kOvenduka noku yi kutha oku yi eta koNooli, sha ningwa oshiwike sha yi mondjila onene yopokati kOshakati nOndangwa, sho a adhika aniwa a londeka oshinima sha yakwa.

Omukonaakoni Omukuluntu mOpolisi ya Namibia mOshakati, Karl Theron, ngoka a kelela pehala lya Komanda yOpolisi mOshana Komufala Ndahangwapo Kashihakumwa, ngoka e li mefudho,moshigongi shAatoolinkundana mOshakati ohela ta ti, Omuhingi nguka gwOloli yomitsalo yOpoosa, okwa kwatwa ta londeke eshina lyOjackpota lwopomukunda Omaalala mondjila onene ya Shakati nOndangwa ongula onene yesiku ndyoka lwopombali yokoongulasha lwaampoka. Chief Inspecta Theron ta ti aakwashigwana mboka ya lopotele Opolisi oshinima shika, oya ti kutya oya mona ohauto yomukwashigwana gwontumba, ta sitopa Ololi ndjoka yOpoosa pOmaalala mpoka, nashi ololi ndjoka ya sitopa, ngoka gwokahauto okwa kutha oshinima, ano Ojack Pota mokahuto ke hoka noku yi londeka pamwe nanakuhinga Ololi yOpoosa mOloli yOpoosa. Ololi yOpoosa ndjika, ngele oya lekelwa mOshakati, kayi thikama we mondjila, yi londeke sha, shapo okuninga ya teka.Chief Inspecta Theron ota ti sho a lopotelwa oshinima shoka, oya dhengele Opolisi ya Ndangwa ndjoka ya tula einda mondjila meendelelo nokukwata Ololi ndjoka yOpoosa. Sho ya konaakona, oya mono kutya oshinima shoka sha londekwa pOmaalala, oJackpota. Omuhingi mokupulwaapulwa okwa popi kutya okwe yi pewa kulye na okwa li te yi fala peni. Chief Inspecat Theron ota ti otaya kongo nee omulumentu a tseyika nawa kuyo gwedhina Jafet Nashidengo Mvula Elias Nduu. Ta ye mu indile kutya aniwa ni ilopote meendelelo kOpolisi, unene tuu kwaandjoka ya Ndangwa nenge ngaa ya Shakati, manga inayi mu konga.Omuhingi gwOloli okwa patululilwa oshipotha shokwaadhikwa noshinima tashi fekelwa sha yakwa. Okwa holokele mompangu oshiwike shayi.