Banner Left
Banner Right

Omufeekelwa moshibofa shoNamdia okwa li alombwela ovanhu kombinga ‘yefiku londjabi lakula’

Max Endjala

MAX Endjala (44), omufeekelwa moshibofa shomunyeka wokawe kongushu yoshimaliwa shi fike peemiliyona N$350 oo kwa li wa ningwa Olomakaya kehangano ledina Namib Desert Diamonds (Namdia), odula ya dja ko okwa li va ti a lombwela kaume kaye kutya okwa teelela efiku londjabi lakula olo kwa li tali ke mu kufa ko onghalamwenyo yaye aishe.

“Okwa li a teelela efiku londjabi lakula olo tali mu kufa ko onghalamwenyo aishe,” Odjo oyo kwa li ya vakelwa ko keenghundafana osho ya ti ngaho.

Eenghundafana vati oda ningwa odula ya dja ko pefimbo opo Endjala kwa li a mona oshimaliwa shi fike pomiliyona okudja kongeshefa yokondje yoshilongo.

Vati okwa lombwela ookaume kaye kopofingo kutya okwa li a teelela okutameka ongeshefa nomulandifi wokawe waNamibia nota ka xulifa po oilonga yaye ngee ongeshefa ei oya piti.

Pefimbo lefyo laye, Endjala okwa li omunailonga kehangano loTrustco Group ongomunambelewa akula woilonga yomeni lehangano noshikondo shomakonakono opaungoba.

Efyo laye olo le ya pefimbo lomunyeka ola kumwifa ovanailonga pamwe naye vo paife naavo vakulu.

Endjala okwa dalelwa komukunda Oluteyi, moshitopolwahoololo shaMusati, oko a tameka ofikola omanga ina ya kofikola yopombada yaMwala nokosekundofikola yaShakati.

Ovashiivikila ova ti, Endjala okwa kala mOneshila naina womepata eshi kwa li e li mondodo 12 mOshakati Secondary School.

Okwa waimina ehangano loTrustco konima yeedula 21 da pita ndee fiyo otai ponhele youkulunhuwiliki konooli yaNamibia.

Konima okwa li a tuminwa kombelewa yakula yaTrustco mOvenduka. Oko a mona ondjokonona yokukala omunhu ito mu pewa luvali nomunailonga a piyaana. Peemhito dimwe, okwa longele ongomunambelewa akula weameno laTrustco.

Ovanailonga pamwe naEndjala alushe ova kala nokutya okwa li omunhu muwa wombili, ashike natango okwa li yoo e shiivike kutya ke na onghenda kwaavo tava teya oveta nelandulafano lehangano.

“Okwa li omunambili nakeshe umwe koilonga, ashike ngee okwa tameke okukuningila omakonakono, ngaho omafiku oye okukala mehangano otaa valulwa. Vahapu ova fiya po ehangano va fya ohoni molwomakonakono aye,” Odjo osho ya ti ngaho.

Omanga ovakulunhu pofulula yaTrustco ‘onhinhatu’ mehangano otaku tiwa vati okwa li ve mu yele eshi vati kwa li a tameka okukonakona eengudu davo, ovanailonga vopedu okwa li ve mu tala ko kutya omunawino wouyuki.

Okwe lifiya mo moTrustco. Shaashi okwa li e na oshinakuwanifa shomakonakono, omakonakono aye luhapu okwa li a eta ovanhu opo va tewe moilonga.

Omanga Endjala kwa li e shiivike koTrustco kutya omuhona muwa, ina fila nande onghenda ovo kwa li inava hala okufimaneka eemhango davo. Okushiivike nawa kutya okwa li a kufa ovanhu vahapu moilonga eshi va vaka eembapila dokokandjuwo noimaliwa.

“Itandi itavele ashike nandenande kutya ota dulu okukwatelwa moshinima shi li ngaho. Ohandi mu dimbulukwa kutya omulumenhu omuvateli keshe efimbo u na eshi wa hala ko kuye.

Eshi handi dimbulukwa lela osheshi kutya ongomuhona, iha danauka noinima. Okwa li omulumenhu oo ito hale nokuli nokukala u na oupyakadi naye kombinga yomilandu doilonga shaashi ote ku taataya ngee okwa pumbwa okushininga.”

OMUDANAUKI- A NINGA OMUFEEKELWA

Endjala kakwa li nande a pumbwa ookaume. Umwe womovanailonga pamwe naye, Andrew Nghidishange, okwa ti okandenge kaye oko ha nu otee pamwe nako keshe efiku.

Okwa ti okwa longa naEndjala oule weedula 17.
“Otwa kundafana shihapu. Okwa li omulumenhu womayele, e na eendunge. Okwa li e litula mo moilonga yaye.

Okwa li ashike a fa okamwamememati kange kashona,” Nghidishange osho a ti ngaho.

Pondje yoilonga, Endjala okwa li e na oukaume nomunangeshefa wokawe Doron Cohen.
Cohen naEndjala okwa li hava longo pamwe koTrustco.

“Okwa li ookaume, ashike kakwa li nande tu na omaudafano opangeshefa,” Cohen osho a ti ngaho.
Omukwashiwana waIsraeli okwa li omunangeshefa akula e na omakwatafano novanambelewa va fimana.

Joel Angula, mumwaina waEndjala vati, oku li umwe womovatonateli vomaliko koNamib Desert Diamond noku li omunambelewa wopolifi mukulu.
Okwa li ha longo koshikondo shopolifi shomadeulo koPius Joseph Kaunda Police Training Centre koHoumoed koshitopolwahoololo shaMaheke.

Ovapolifi vatatu ovo ve shi Angula ova lombwela oThe Namibian kutya okwa li omukwateli komesho womadeo.

Momudo 2014, okwa li ha longo oukwaveta u na sha newiliko nekwatelo komesho lomeni. Okwe lihonga koshiputundilo shoNamibia Science and Technology e li hongela oinima ya pamba ouyuki woimbuluma.

Omunambelewa a mwena nai,” Umwe womovapolifi vatatu osho a ti ngaho.
Angula okwa li a holoka momhangu yamagestrata mOvenduka Etivali.

Okwa taalela oibofa yedipao, onghendabala yedipao nokukala nokawe inaka tetwa.

Opolifi oya ti otai ningi oshoongalele noikundaneki onghela opo i yandje opauyelele kombinga yomunyeka ou. Oshinima shimwe shakula shomakonakono okutala ngee Endjala okwa li a dipawa ile okwe lidipaya mwene, ngaashi sha kala nokulopotwa.

Manga omunyeka ou inau ningwa Olomakaya, Endjala vati okwa li a ya komadeulo oudano waye oo e hole. Konima, okwa shinga ndee tai keembelewa daTrustco mOvenduka.

Vati okwa tula otuwa yaye poilonga nokudja opo okwa li a pitulwa po kohauto imwe.

Oshinima shimwe vali tashi lipulwa osheshi kutya opwa li ngaa shili ovafeekelwa vamwe vavali ovo va faduka po. Potete, Namdia okwa ti ovafeekelwa vavali ova faduka po. Paife, opolifi otai ti kapu na vali ovafeekelwa vamwe.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!

Latest News