Omudhani omukulu gwOshakati City a hulitha

OMUDHANI omukulu gwOsipana yOshakati City a tseyika nawa Venasiu Haufiku Victory, a tseyika unene nawa nedhina Haufiku, okwa itsuwa a sila megumbo lye mUupindi mOshakatiuninginino ongula yeti 18 Apilili 2009.

Kakushiwike kwali kutya Haufiku okwa si koshike, nOpolisi oya kala tayi konaakona eso lye kutya olya etwa naanaa koshike.Nakusa Haufiku okwa kala omudhani gwOshakati City uule wethimbo ele lela, na oye gumwe gwomaadhani ya simana ya dhana nawa nonoonkondo mOsipana ndjoka yOshakati City sigo nokuli tayi yi mo Namibia Premier League, ano muudhano uunene wopashigwana. Nakusa Haufiku okwa thiga ko okanona ke kokamati, meme gwe nomumwayinamati. Okwa fumvikwa ohela mOngwediva okuzilila mOngeleka yawo ya Katoolika ka Roma mOshakati, omanga oshituthidhimbuluko she sha li ko kongulohi yEtiyali lyoshiwike shika pegumbo lye mUupindi mOshakati moka. Mokati kaapopi, ano kaagandji yOmatumwalaka gomahekeleko, omwa li Menindjela yOshakati City tate Pa Jackes, ngoka a ti kutya Osipana yOshakati City otayi dhimbulukwa nakusa Haufiku a li omudhani omwaanawa, omunankondo, omuvuliki nokwa li e shi okuya po nokuza po.
Ta ti Osipana ayihe yo Shakati City okuza ngaa kewiliko lyayo lyopombanda noshowo maadhani, iilyo nOosapota dhayo otayi gandja omahekeleko omanene kofamili, kaakwanezimo, kookuume nokoonakuthigwapo ayedhe ku tate Haufiku.
Tate Kornelius Kapolo oye a lesha ondjokonona ya nakusa Haufiku nokonima okwa landula iipopiwa yilwe ngashi shoka shAavali, shaamwayina , shokanona ke, shookuume, shaashiinda nosho tuu. Omudiakoni Paulus Moses oye a ningi Elongelofumviko mOngeleka yawo ya Katoolika ka Roma ya Shakati yo aafumviki mOngeleka ndjoka taya kutha ko oshinakugwanithwa shawo shefumviko. Oshifo shetu otashi gandja omahekeleko koonakuthigwapo atuheni.