Ompumbwe yIinamunate pOshivelo

AAKALIMO yamwe yopOshivelo mOshitopolwa sha Shikoto, oya lombwele The Namibian mehuliloshiwike lya zi ko kutya oye na uupyakadhi wiinamunate hayi pu mo nziya mOositola ndele mondoolopa yawo ya Shivelo tamu ka la mwaa na nande oshinamunate shimwe, unene tuu mbyoka yooCoca Cola.

Aakalimo mbaka otaya ti kutya kaye shi nee nawa kutya pamwe Aanangeshefa yomOshivelo oyo kaya mbesitela iinamunate ya gwana molwashoka pamwe oye wete kayi landwa nawa walyewo. Aakalimo mbaka otaya ti kutya kuyo shi ya tala aakalimo oyendji ohaya nu ngaa onamunate, unene tuu pethimbo ndika lyuupyu, ashike nee ohaye ki adha mOositola dhomOshivelo kamu na ashike nande oyo onamunate yimwe. Otaya indile nee kaanangeshefa aanene naashona mOndoolopa ya Shivelo, ya ninge ekwatathano nOofabulika dhIinamunate moshilongo, ya kale haya landa iinamunate ya gwana opo mOshivelo mwaa kale we ompumbwe yiinamunate, ngashi hashi holoka mo omathimbo ngaka.mOndoolopa ya Shivelo omuna ngaa ngeno Oositola oonene, ngashi Orestauranda nObaa onene yomusamane tatekulu nakusa Kapiye, Opunyu noshowo Uukumwe wa tate Moongo nosho tuu, ashike omuntu oto nyengwa nee okushi uvako kutya omolwashike mu na okukala hamu kala ompumbwe yiinamunate.Pethimbo oshinyolwa shika tashi yi komanyanyangidho, inatu vula okwiimona nayamwe yomaanangeshefa mOshivelo opo ye tu lombwele kutya uupyakadhi wiinamunate hayi pu mo mOshivelo, ouli naanaa peni.