Ompangu yopombanda ya egululwa mOshakati

OMUPERESIDENDE Hifikepunye Pohamba okwa egulula etungo epe lyOmpangu yOpombanda mOshakati oshiwike sha yi. Ompangu ndjika oya adhika ya tameka nale iilonga mu Febuluwali nuumvo.

Mokutaamba aayenda Ominista yUuyuki me Pendukeni Ivula Ithana okwa ti Ompangu yOpombanda mo Shakati ota yi ka yu lulula uuwindji wiilonga yompangu yopombanda mo Venduka. Okwa ti okwiitaala kutya ota yi kumike omahangano gaatseyimpango ga totepo iitayi yago muumbangalantu woshilongo, no pamukalo nguka aakalimo yokombinga ndjika ota ya ka mona ompito okwaadha omayakulo gopampango ge li popepi na yo.Ompangu ndjika oyi na aaniilonga 20 no ya tegelelwa yi kale naaniilonga 60. Ompangu ndjika oyi na iitopolwa itatu yokupulakenena iipotha, shimwe shaambika oshi na iilongitho yopashinanena yi li muuwanawa woonakuyonenwa. Mompangu ndjika omuna otiivii ya edhila ndjoka ha yi longithwa koonakuyonenwa opo kaa ya tsakanene oshipala noshipala naamboka ye ya yonene sha. Ompangu oyi na oombelewa ndatu dhaapanguli, ombelewa yomushangi gwiipotha, oombelewa dhaaniilonga yomompangu, nombelewa yomutamaneki ndjai, noshowo yomeestela gwompangu yopombanda. Ongulu yomambo oya thanekwa yi etwemo nale mehala ndika.