Ompango yomatungo ya ponokelwa

ONTOTWAVETA yoku wilika oshitopolwa shomatungo ndjoka tayi kundathanwa moparliamende oya fa inaa yi pandika kiilyo yegumbo, unene tuu kiilyo yongundu ta yi pangele.

Omutotimpango gwoSwapo, Paulus Kapia okwa thaneke kutya na yi tumwe kokangundu koparliamende, oshoka oya nyolwa pautechnika na ita yi uvikiwako nuupu kukehe omuntu Iilyo yo kabinete oya ulike kutya aatungi aashona inaya talika mompango ndjika noya thaneke kutya ando na yi kale pena oondondo dha yooloka dhomahangano gokutunga.Yamwe oya ti oye na uumbanda kutya iimaliwa yokwiishangitha yaatungi otashi vulika yi kale yi li pombanda.Ontotwampango ndjika oyi na elalakano oku shangitha aatungi noshowo omahangano gokutunga nolutu lwaatungi opo pu yandwe omahangano ngoka haga tungu ndele konima oga kana po.Ominista mombelewa yomuperesidende, Albert Kawana ngoka woo eli hahende ndjayi gwepangelo okwa ti opwa fa pwaana omilandu dhokutunga momikunda. Omanga kombinga yimwe ompango otayi utha oofuto oondhigu unene kwaamboka taya pogola ngele oya tungu omatungo gawo yene unene momikunda.Kawana okwa ti ompango ndjika otashi vulika yi mu mangithe ngele ye okwa tungu egumbo lye nenge ondunda megumbo komukunda monakuyiwa.Okwa indile kutya omautho ngoka ge li mompango ndjoka oshaanawa ngele ngaka taga kala gena ashike oonkondo miilando nomohala ngoka taga kondololwa ndele ha komikunda hoka kwaana ekondololo lyasha.Onkundathana odha undulilwa koshiwike tashiya opo Minista yUuyuki, Pendukeni Ivula Ithana ta ka popya kombinga yompango oyo tuu ndjika.Ontotwampango manga inaayi etwa koparliamende , oha yi shangwa kaashangi yoontotwaveta muuministeli wUuyuki, Omushangwa ngoka inaagumanithwa oha gu gandjwa kokabinete ,hoka oko haka tokola kutya ontotwampango na yi tumwe koparliamende.