Ompango yomakwatathano yapiti pwaana elundululo

EVUNDAKANO olya li ta li pangele mEgumbo etiyali lyopashigwana metine sho aaningimpango ya pititha ompango yOmakwatathano moompata dha hugunina pwaana omalunduluko gasha.

Peha lyoku tya ompango ndjoka oya pitithwa pamwe nomalundululo ngaashi sha thanekwa kokangundu kiikwapondje, egameno nepopilo lyoshilongo, hoka ka li ke li kohi wuunashipundu womutotimpango Johny Hakaye, Egumbo Etiyali lyokuninga oompango, olya zimine ompango ndjika inaa li tya sha kombinga yomalundululo gasha.Othe Namibia oyu uvu kutya epuko olya li ashike lya dhimbululwa konima sho ompango ndjika ya ziminwa nale, naanambelewa oyo ya pewa ombedhi aniwa sho inaa ya lombwela aatotimpango mbala kombinga yoshinima shika.’Kandi shiwo shoka ta shi ningwa po ngashingeyi osha fa kutya aantu oya nyanyukwa unene no ya dhimbwa. Oya li ye na okuzimina ompango nomalundululo nenge pwaana malundululo, ndele oye pititha ashike noku yi zimina.,’onzo yimwe ya ti.Sho ontotwampango ndjika ya piti moshikako shahugunina Megumbo Etiyali lyopashigwana pwaana omalundululo, ka pe shiwike ngele ota yi vulu okugalulwa yi talululwe nenge pamwe egumbo ota li etha ashike yi ye kOmuperesidende Hifikepunje Pohamba opo e yi shaine yo yi vule oku ya miilonga. Sha hala okutya ngele opena omalunduluko nena ngaka ota ga ka ningwa ashike nale. Omunashipundi shEgumbo Etiyali lyOpashigwana omusamane, Asser Kapere, omupevi gwe, Magreth Mensa Williams, amushanga gwegumbo ndyoka Panduleni Shimutwikeni na Hakaye ayehe ka pwa li ngoka a vulu okupopiwa naye metine komatango. Metitatu ongundu yiikwapondje, egameno, nepopilo lyoshilongo oya tula poshitaafula omushangwa hokololo gwayo kombinga yomagwedhelopo ga zi mepulakeno lyaakwashigwana nomathaneko lundululo ngoka ya gandja. Omathaneko oga kwatela mo kutya, omupanguli peresidende oye awike ena okugandja nenge omupanguli ngoka a pewa uuthemba kuye oye, ena oku gandja elombwelo kutya omakwatathano gomuntu gwontumba nenge gehangano lyontumba naga tsakanekwe.Etsakaneko ndika na li ningwe woo ngele ope na uuyelele nontseyo kutya olye eli pula no ta li ningilwa lye, na ota li ningwa molupe lwomakwatathano geni po ngele ndika ota li ka tulwa miilonga. Ongundu ndjika oya li ya ningi omapulakeno goshigwana uule womasiku gatatu moVenduka kuyele omwedhi nguka, opo yi mone omathaneko oku za moshigwana nokomahangano gopashigwana kombinga yontotwampango ndjika.