Ompango yomakwatathano ta yi pulakenwa koshigwana

EGUMBO Etiyali lyokuninga oompango moshilongo ota li ningi iikonga yokupulakena iiyetwapo yaakwashigwana kombinga yontotwampango yOmakwatathano.

Iikonga mbika yokupulakena oshigwana ota yi tameke nena sigo ometitatu.Ongundu ndjoka tayi longekidha omapulakeno ngaka oya hiya iifonkunda, omahangano goongodhi dhokopala naandhoka dhopeke. Uuministeli womauyelele ,Ehangano lyiilonga yomonanguwi na yo oya ithanwa opo ya tye ko sha kontotwampango ndjoka.Ehangano lyiikundaneki muumbugantu wAfrika, MISA,ombelewa ya ahende ndjai, yOmbudsman, Legal Assistance Centre,Ongonga- hangano yoongeleka moNamibia, Okakommissi komakwatathano moNamibia, Unam no Polytechnic ya Namibia oya ithanwa opo ya gandje omadhiladhilo gawo kombinga yontotwampango ndjika.Ontotwampango ndjika ota yi utha kutya pu kale pena ehala lyoku tsakaneka omatumwalaka gopangodhi nopa internet.Omahala ngaka otaga futilwa komahangano goongodhi dhopeke, no ta ga kala ge li metonatelo lyaanambelewa yiilonga yomonanguwi.Ota ku tiwa etumwalaka ota li tsakanekwa , konima ngele okushininga okwa ziminwa koMpangu yopOmbanda.Ontotwampango ndjika oya piti nale mOshigongi shopashigwana muJuli 2009, konima sho oompata dha yo dha li oombwinayi,naashika osha li sha fala iilyo yomoparliamende yoongundu dhompilameno yi ze mo moshigongi esiku ompango ndjika ya ziminwa omolwa uuwindji wiipundi yongundu ta yi pangele mOshigongi shOpashigwana.