Ompango yomakaya ta yi kundathanwa moshigongi shopashigwana

OMPANGO ya kala ya tegelelwa okukondolola omakya niikwamakaya oya tulwa poshitaafula mOshigongi shOpashigwana metitatu kOminista Yuukalinawa, omusamane Richard Kamwi.

Kamwi okwa a li a tseyithile egumbo metiyali kutya ota ka tula ompango ndjika poshitaafula metitatu.Oshigongi shOpashigwana sho sha galuka mefudho metiyali osha longo ashike uule wominute 20 no ku za mpoka aakwashigongi megumbo ndika oya shuna ishewe komagumbo. Iilyo yoshigongi shopashigwana oya shuna kegumbo konima sho mboka yoompilameno ya mana okupula omapulo gi ili no gi ili ga yamukulwe koominista .Amushanga ndjai gwo DTA McHenry Venaani okwa pula Omuprima Minista Nahas Angula ngele amushanga gwoKabinete nenge amushanga gwomuPeresidende Hifikepunje Pohamba okwe ya pa epitikilo opo ya longe iilonga tayi ya futu pondje yiilonga yepangelo.Venaani okwa pula ngele ombelewa yomuPrima oya gandja epitikilo opo mbaka ya longe iilonga ta yi futilwa pondje yiilonga yawo yepangelo.Ompango yAaniilonga yepangelo yomumvo 1995 ota yi ti omuniilonga gwepangelo oku na oku pewa epitikilo opo a longe iilonga ta yi mu pe ondjambi pondje yiilonga yepangelo mbyoka ha longo.Kombinga yamushanga gwoKabinete naangoka gwomuperesidende Venaani okwa ti oye na oku pewa epitikilo komuPrima.Venaani okwa hala oku pewa omadhina gaantu ayehe mboka ya ninga eindilo li na sha nokulonga iilonga ta y futilwa pondje yiilonga yepangelo.Ta pula kutya omahangano gangapi ge niwe kooamushanga taya kalele mepangelo,ngoka ga pewa ootendela dhiilonga yepangelo noshowo kutya iimaliwa yi thike peni ya futwa mootendela ndhika uule woomvula ndatu dhiimaliwa dha piti?Okwa pula woo ngele Omuprima okwa tseya tuu kutya aaniilonga yepangelo oha ya longitha ontseyo yawo kombinga yootendela opo ya vule oku mona po iilonga mbika yootendela yoyene.Okwa pula Angula ngele ota pa ningwa omakonakono opo oshinima shika ta shi limbilike shi hulithwepo..Venaani okwa pula ishewe Ominsta yegameno kombinga yondando ndjoka ya futwa sho Namibia a landa oobautu dhiita kOBrazil na aanambelewa yeni oyo ya li taya longo mokulanda oobautu ndhika. Noshowo ngele opena ekonakono lyomeni ta li ningwa moshinima shika.Tsudao Gurirab gwo COD okwa pula Ominista yomidhiingoloko Netumbo Nandi Ndaitwa kombinga yeuvathano pokati kehangano lyoNWR na gamwe gopaumwene kutya euvathano ndika ota li ti shike naanaa., unene ngele tashiya ketungo podama ya Von Bach pondje yOkahandja.Okwa hala okuuva ngele pamwe opena oshitopolwa shehala ndika sha landithwa po.No kwa hala woo okuuva kutya iiyemo yithike peni NWR nenge oshiketha shepangelo tashi mono melongelokumwe ndika.Pahokololo lyomutoolinkundana eli ku yemwene lya nyolwa moThe Namibian omathimbo ga zi koNWR okwa shaina aniwa euvathano nenge okondraka nehangano lyaaluudhe opo ehala ndika li humithwe komeho ndele ngashingeyi mboka taya longo iilonga mbika ehangano lyaaChiina.Okwa pula ishewe kutya uunake omishangwahokololo dhopashimaliwa dhe hangano lyo NWR ta dhi tulwa poshitaafula unene tuu ndhoka dhoomvula dha piti.Arnold Tjihuiko gwo Nudo okwa pula Ominista yiilonga niiyenditho omusamane Helmuth Angula kutya olye e na oshinakugwanithwa shokulanda omashina gokolutenda ngoka ga za kOchiina. Oshoka ota ku tiwa ita ga tsu kumwe nomalutenda gaNamibia.Jurie Viljoen gwo Monitor Action Group (MAG) okwa hala okuuva ku Angula kutya omolwashike omambo goHansard moka hamu nyanyangidhwa oonkundathana dhomegumbo ina dhi nyanyangidhwa natango unene tuu dhoomvula oku za Juli 2004 sigo Septemba 2005, noshowo giigongi yimwe yomumvo 2007.Viljoen okwa pula woo Ominista yaaniilonga omusamane Imannuel Ngatjizeko ngele uuministeli we owu na omahala giilonga gooengineers, naa yaluli yiipumbiwa pomatungo noshowo aaniilonga yomaludhi gopautechnica.Okwa ti ngele opu omahala giilonga ya tya ngaaka omolwashike mbika ita yi gandjwa kaatiligane mboka na yo ye li aaNaamibia no ya longwa miinima mbika.