Omiti dhoondunga dha za muuzilo wopokati

OSHILUKU shotango shomilunga dhoondunga hatu ti odhuushimba, dha za koshilongo shUukwaniilwa wa hangana waArabia[United Arab Emirates] omayovi 10 000 osha thiki pokapale koondhila kopaigwana ka Hosea Kutako omaandaha.

Omilunga ndhika dhuukokele womumvo gumwe netata otadhi ka falwa komapya geli podama ya Naute, mpoka pena iilonga yuunamapya yelongelokumwe nehangano lyomapendulepo lya Namibia, na Al-Dhahara. Omilunga omayovi 10 000 omikwawo odha tegelelwa dhi ka thike moshilongo ishewe mu February omumvo tuuka. Omilunga ndhika dha thikama momaludhi geli gahetatu goondunga otadhi ka kunwa pehala mpoka podama ya Naute muSeptember nuumvo na ota dhi kala nokusilwa oshimpwiyu sigo dha tula ko oondunga konima yomimvo ntano.Okuza kokwiima, kwotango omilunga ndhika otadhi kala nokwiima uule womimvo 50 sigo 70.Oondunga ndhika tadhi longwa poshikunino mpoka odhindji ota dhi ka landithwa po kiilongo yopondje, noonkwawo otadhi ka landithwa meni lyoshilongo.Uuna dha tameka okutewa otaku tengenekwa kutya oproyeka otayi ka mona iiyemo yoprofita yoodola omayovi 50 000 omumvo kehe mohektara yimwe yomilunga.Ngele shika oshili ngaaka ota ku tiwa oondunga otadhi kala dhina oshimaliwa okuyeleka noshikunino shomandjembele.Pethimbo iilonga yomilunga ya yi metifa aaniilonga 180 ota ya ka longa miilonga mbika ethimbo alihe , omanga aaniilonga 1 150 ota ya kala noku pewa iilonga ethimbo oondunga tadhi likolwa. Iilonga mbika oyo elongelokumwe pokati kehangano lyo ko United Arab Emirates nehangano lyomapendulepo lyopashigwana lya Namibia. Meuvathano ndika epangelo olya gandja evi mpoka tapa kunwa omilunga, omanga oshilongo shoka shaArabia otashi gandja oshimaliwa okufutila iilonga, tashi gandja aanuunongo, uunongo mewiliko noshowo uungomba mekalekepo lyuunamapya mbuka.Iimaliwa ayihe kumwe ta yi kala ya pungulwa muunamapya mbuka oyo oodola 104 uule womimvo ntano.