Omiti dhepango dha Namibia odhi li nawa

OSHILONGO shika oshina omukalo gwakola kombinga yomiti dhepango ndhoka hadhi pewa aanuuvu miipangelo ayihe.

Olutu lwoku kondolola omiti moNamibia halu ithanwa, Namibia Regulatory Medicines Council[NRMC] oha lu soshimpwiyu kutya omiti adhihe hadhi etwa moshilongo odha gwanithapo omautho guundjolowele gopaigwana, onkene aanuuvu inaya pumbwa oku kala nuumbanda kutya otashi vulika haya longitha omiti dha nkundipala.Ekwashilipaleko ndika olya gandjwa komunawino gumwe ngoka ena ontseyo yiilonga ya NRMC, eshi ningi mokuyamukula oshinyolwa sha holokele moshifo the Washington Post kombinga yekonakono ndyoka lya mono kutya omiti dhimwe ndhoka dha ziminwa kehangano lyuundjolowele muuyuni nenge World Health Organisation, oku gandjwa koohepele muuyuni aniwa kadhi shi omiwanawa. Oshinyolwa shoka osha kankamekelwa komapekapeko ga ningilwe komunawino miinima ya pamba omiti. Nguka okwa ningile ekonakono lyomiti ndhoka hadhi landwa kaagandji yooshali noku pewa iilongo mbyoka opo tayi putuka yi pange aantu yayo komavu, ngaashi malaria, no teebee.Omushangwa ogwa ti omiti dhimwe dhaandhoka odha monikwa kutya kadhi li nawa, nopoompito dhimwe ndhika ohadhi etele aanuuvu uupyakadhi pehala lyoku ya aludha.Omiti ndhoka dha konakonwa palaboratoriuma odha landwa mooapoteka miilongo ngashi Angola, Kenya, na Ghana. Ekonakono olya ti omiti dhimwe dhaandhika dha ziminwa ko WHO odha ndopa oku pita ekonakono ndyoka osho aapekapeki ya mono. O The Namibian oya pula ewiliko lyopombanda lyo shikondo shUundjolowele opo li fatulule nawa ngele Namibia okwa gumwa koshinima shika unene tuu sho naye ha mono omiti okuza kiilongo iikwatheli. Aanambelewa mboka inaa pa monika nando ogumwe a yamukula ongodhi ye.Kakele komunawino eshi nawa iilonga ya NRMC, ngoka a popi ndele ina hala okwiitumbula kutya oye lye. Nguka okwa ti shoka, eshi ooshoka kutya ewiliko lyoku kondolola omiti mo Namibia olya kindja kutya ngaaka oha li pitika ashike omiti ndhoka omiwanawa odho dhi longithwe moshilongo muka.Okwa ti omiti ndhoka hadhi longithwa moNamibia ohadhi konakonwa nuukeka , niishewe omahangano ngoka haga gandja ndhika oha ga indilwa opo ga landele oshilongo omiti ogena oku shininga pa tendela. Ngele naku longa omiti ndhoka keshiwike,NRMC oha tumu aanawino ye kofabulika yehangano ndyoka oku ka tala kutya ehambulo lyomiti ndhoka ota li ningwa pamuthika gwopaigwana . Ekonakono ndyoka oha li futilwa kehangano ndyoka lya pewa otendela. Iiholelwa yomiti nenge oosampula dhomiti ndhoka tadhi landwa ohadhi konakonwa woo moolabora dha Namibia, moka muna aanawino yalongwa miiputudhilo miinima yomiti yadhengamba muuyuni. Omunawino nguka okwa tsikile a ti oku konakona omiti kashishi ashike oshinima hashi ningwa lumwe aluke ndele, uuhampi womiti ohawu kala noku konakonwa opo pu talike ngele ndhika kadhina iiluudhiki yontumba.Omunawino okwa ti omiti ndhoka odhina oku kala dha shangithwa moshilongo niishewe odhina woo oku kala dha shangithwa moshilongo moka dha hambulwa na ohadhi longithwa woo mwaashoka.Oraata ndjika yoku kondolola omiti oya tindile okuzimina oshikondo shUundjolowele shi longithe omiti dhetuntilo dha longwa moCuba molwaashoka ndhoka kadha li dha gwanithapo omuthika gwopaigwana, omuthika gwaNamibia noshowo ngoka gwehangano lyuundjolowele muuyuni.Ombesitelenga yomiti ndhika nando okwa li ya futilwa ku holomende oya li yina okushunithwako molwaashoka WHO okwe yi tindi opo yi longithwe muka.