Ominista Yomapendulepo ya Ndowishi metalelopo

OMINISTA yOmapendulepo ya Ndowishi oya thiki metitatu moNamibia metalelopo lyuule womasiku gatatu.

Minista, Dirk Niebel ota talelepo, olutiyali menenevi lyAfrica konima sho a taamba iilonga mbika mu Novemba 2009.Ota kala muNamibia uule womasiku gatatu no ta ka kundathana kombinga yelongelokumwe noshowo omapendulepo noominista dhaNamibia.Niebel ota ka talelapo woo omuperesidende, Hifikepunye Pohamba.Okwa tegelelwa woo a ka tsakanene naakalelipo yomahangano gaakwashigwana noshowo oongundu dhopolitika.Oku za kemanguluko, Ndowishi okwa kala ena ekwatathano lya shewa na Namibia, okushitalela monakuziwa.Ndowishi okwa kwathela Namibia mehumokomeho noodola oobiliona hamano oku za nkene oshilongo sha manguluka.Metine Minista,Niebel otaka kutha ombinga moshituthi shoku tala nkene iilonga yetungo, ly Ohorongo Cement factory tali humu komeho,popepi noshilando shOtavi.Ofabulika ndjika otayi tungwa koodola oobiliona 2,6.Ofabulika ndjika oyo epungulo enene lyuukilila lya ningwa kuNdowishi, okuza nkene Namibia a mwene emanguluko.Ohorongo Cement Factory, oyo okanona kehangano lyosamende lyaNdowishi, Schwenk Zement KG.Ofabulika ndjika otayi ka longa osamende yootona 700 000 komvula kehe ngele ya tameke iilonga yawo.Otaku tengenekwa kutya aaniilonga omathele 300 otaya ka longa pofabulika mpoka ethimbo alihe ngele ya tameke iilonga ya wo, omanga aaniilonga 2 000 ota ya kutwa miilonga inaa shuukilila molwaashoka ofabulika ndjika oya tungwa po. Mbaka otaya ka longa ngaashi mokuhinga iiyenditho mbyoka ta yi ka tuta osamende okuza mpoka, otaya longele omahangano ngoka taga landa nokukalanditha osamende okuza mpoka.Omahangano ngoka ga gandja iimaliwa opo ofabulika ndjika yi tungwe ogo German Investment and Development Corporation, Development Bank of Southern Africa na European Investment Bank. Iimaliwa ayihe kumwe mbyoka ya longithwa komahangano ngaka oyo oodola oobiliona 2,6.Minista, Niebel ota ka, ilonga nokutseya ooprojeka ndhoka ta dhi futilwa kepangelo lye , yimwe yomwaandhika oondjoka yegandjo lyoshimaliwa oshishona momvula 2008 shapewa aanangeshefa aashona ye li 6 000 ooperesenda 92 dhaambaka odho aakiintu.Iimaliwa mbika oya kwathele opo konyala aantu omayovi 40 000 ya kale ya kwathelwa shuukilila nenge inaashi ukilila momahupilo goshilongo.Ominista ota yi ende pamwe noshilyo shoparliamende ya Ndowishi, Werner Simmling, noshowo omupopiliko gwewiliko lyehangano lyomapendulepo lyaNdowishi lyedhina DEG , Brunno Wenn, aanangeshefa aaNdowishi, naatoolinkundana oye li woo oshitopolwa sholweendo nduka.