Omiliona dha pungulwa moomaalaka dhiihape

ETUNGO lyomaalaka yiihape niiyimati olya tameke poRundu, noshikako shotango shetungo ndika osha tegelelwa shika manithwe omumvo ta guya mu February.

Pendiki ndika opwa tegelelwa pu kutwe aaniilonga ye thimbo ele yeli omathele gaali 50.Iiyimati niihape mbyoka ya longwa moshitopolwa shika ota yi ka pungulwa noshowo oku landithwa mendiki ndika lili pehala ewanawa popepi nondjila onene ya Trans Caprivi. Etungo ota li tungwa pehala lyuunene wombinemeta omayovi gahamano.Uuna lya pwa okutungwa aantu mboka taya ende nondjila ya Trans Caprivi itaya pumbwa we okweenda oshinano oshile oku ka landa iihape niiyimati mokati koshilando ndele mbaka otaya landa ashike iipumbiwa yawo mpoka nokutsikila ondjila. Minista gUunamapya ngoka a li a talelepo ehala ndika okwa ti oku uvite nawa keyo komeho ndyoka lya ningwa po sigo oompaka. John Mutorwa okwa ti okulonga iihape moshilongo oku li natango eshongo enene, oshoka sigo oompaka kapena omahala ga gwana gokupungula iihape noshowo iiyimati. Okwa kumike aatungi yehala ye li tunge ngaashi lya thanekwa nopathaneko lyalyo. Ehangano lyomatungo lya China lyedhina Jiangshi International Cooperation[CJIC], pahapu dha Buju Jing olya lombwele Nampa kutya endiki ndika ota li kwata oomwedhi 15 okumanitha. Ehala ndika ota li kotha oodola oomiliona 110, na ota li kala li na omaalaka, ehala lyokulandithila, ehala lyomahooli noshowo ehala lya kwaalukehe lyoofabulika. Omahala gafa ndika otaga tungwa pOngwediva mOshana noshowo moVenduka.