Monamibia, mbela ovanhu ovo ve lineekelelwa okwaamena oimaliwa yoshiwana, nosho yo ovafeekelwa ovo va vaka po oimaliwa otashi duli va ka dengwe ashike okanghava koposhikesho.
Kakele komapulo opaveta oo kwa li a ningilwa konima yomivelo opo a vatele ovanhu ovo tava ungaunga nokupata nokulandifa po omaliko ombaanga yoSME va mone nghee ombaanga yepangelo ya kanifa eemiliyona omafele odo kwa li da nuninwa okuyambidida eengeshefa dishona, kapu na vali onghatu ya katukwa kakele kokwoongela oumbangi.
Oumbangi okwa li wa yandjwa komhangu ya shiya ko ndee omhangu okwa li ya kumwa shaashi kapu na nande oihokolola kwa li ya ningwa kombinga yoshinima eshi.
Eemwedi nhee da pita, osho kwa li eedula heyali konima eshi ombaanga yaNamibia ya pata ombaanga yoSME, omhangu okwa li ya pula opo epeko li yandjwe komutamanekindjai Martha Imalwa opo ku katukwe onghatu. Itatu teelele vali. Opu na nale omalipulo kutya ombelewa yaImalwa kai na eshi ya ninga po. Oshinima tashi udifa nai shomeni loshilongo.
Konima yaaishe, ombaanga yoSME okwa li ya totwa inaku landulwa omilandu dimwe, mwa kwatelwa kutya Kamushinda kakwa li ta dulu okukwatela komesho ombaanga nonghee oinima imwe okwa li ya pumbwa okukelela ombaanga ei i pewe omukanda woilonga.
Pakuweda kokuyandja omukanda woilonga nande opwa li pu na oinima inai wapala, ngoloneya wombaanga yaNamibia Iipumbu Shiimi (paife minista woimaliwa) okwa pitika oSME i nuke po omilandu dimwe ngaashi okuyandja omikanda domavalulo oshimaliwa da yela oule weedula nhatu. Ongangala okwa li tai tu tala momesho, omanga ovaleli vetu kwa li ashike va tala kwinya.
Oshidjuu okukala itaku popiwa kutya ombaanga yoSME okwa li ya pitikwa okunuka po omilandu dimwe, shaashi okwa li ya totwa po neyambidido lanakufya pelesidente Hage Geingob okudja pefimbo opo a li ominista yoikwaipindi nopefimbo a li omutwe woshilongo.
Itashi kumwifa eshi epangelo la tula oshimaliwa shi fike pobiliyona moipambuliko yombaanga ei, mokati kovanhu vahapu ovo va kanifa oshimaliwa shavo, ashike nomahangano epangelo okwa li a fininikwa okuyambidida elelo lombaanga olo lihe li nawa.
Omauyelele eedula adishe odo okwa holola kutya oSME kakwa li ashike ya longifwa pamukalo wapuka kovakulunhuwiliki vayo, ashike natango oya kala nokulongifwa papuko kovanambelewa vepangelo nokaaume kavo mokumona oshimaliwa. Kashi shi nande oshimbuluma.
Oulingilingi woSME owa ninga eedula omulongo paife, ndee eshi otashi dulika ashike shi ete Ovanamibia va ka mwenene oshinima eshi ngaashi osho shoihokolola imwe ya mwena po.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!