ESHENGEDINGI likulu moNamibia, Wendelinus Hamutenya, okwa pulwa opo a fute oshimaliwa shi fike poN$40 000 kehangano olo la kalela po ovakwaita vakulu voSwapo, People’s Liberationa Army of Namibia (plan).
Omhupanguli David Munsu okwa pula momhangu yopomba yaShakati Omaandaxa opo Hamutenya, oo paife he liifana kutya omukainhu, Maria Del Rosario Hamutenya, a fute oshimaliwa shi fike poN$40 000 kehangano lovakwaita vakulu voSwapo molwomapopyo aye akaka oo a ula oilyo yehangano muJuli 2023.
Ehangano okwa li la pula oshimaliwa shi fike pomiliyona imwe oshinghwanyu nanho moshibofa shekakeko loukwatya osho kwa li ve mu tulila mo muOktoba 2023.
Munsu okwa popya metokolo laye Omaandaxa kutya ehangano otali ti Hamutenya okwa popya oinima ii kombinga yoilyo yehangano mokavidio kilipa oko ka kala nokweendeenda komalungula momafiku 02 Juli 2023.
Ehangano ola ti Hamutenya okwa ti oilyo yalo oi hole oipala, oilodi noihai ningi oinima yomaulodi, Munsu osho a ti ngaho.
Ehangano natango ola ti kutya okwa ti kutya oilyo yalo oilai, omauluvi avo okwa li a tanauka, mokati ashike kaikwao.
Ehangano natango ola ti Hamutenya okwa lundila oilyo yalo kutya kai hole omashenge noya tuka Hamutenya nomashenge akwao.
Ehangano otali ti, omapopyo aHamutenya okwa li a puka nokwa nyika oshiponga nokeeli paveta.
Hahende waHamutenya okwa li tete a lombwela omhangu kutya okwa hala okukondjifa oshibofa osho a tulilwa mo. Hahende okwa dja mo moshibofa omu odula ya dja ko nokudja opo Hamutenya okwa dopa okuholoka komhangu ya shikula, Munsu okwa twikila noshikumungu eshi puhe na omukondjifi.
Munsu okwa ti kutya:”Nakutula mo oshibofa, molwekakeko lomaukwatya olo, okwa ti oilyo yehangano oya shekwa nokudinika, osho sha nyona ondjokonona yavo. Pakuweda po, oilyo yehangano eli oya kala nokuulwa kutya oilodi.
Okwa twikila nokutya: “Kakele ashike komatukano, oinima oyo ya popiwa kuHamutenya kombinga yoilyo yehangano eli otai nyateke omaukwatya. Otai monikifa oilyo yehangano ya fa ihai dilaadila nawa moshiwana.”
Munsu natango okwa ti kutya Hamutenya okwa dopa okukondjifa oshibofa eshi momhangu, nande okwa li a udaneka moikundaneki kutya ote shi ningi.
“Otwa itavela kutya omapopyo aa okwa tandavela nokwa li a monika kovanhu vahapu,” Munsu osho a ti ngaho.
“Natango osha talika ko vali kutya, nande okwa li ta pulwa a yandje ombili, Hamutenya okwa dopa okushininga.”
Pamaliudo aye okuyandja ehandukilo loshimaliwa shi fike poN$40 000 kuHamutenya eshi a kakeka omaukwatya ovanhu oshinima shi li mondjila, Munsu osho a ti ngaho.
Okwa pula yoo vali Hamutenya opo a fute oshimaliwa shopaveta shehangano osho sha longifwa moshikumungu omu nosho yo oishoshela yeepelesenda 40 doN$40 000 keshe kodula, fiyo oshimaliwa ashishe eshi sha futwa. Ehangano okwa li la kalelwa po kuhahende Jonas Matheus.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
