Minista woundjolowele nomayakulo opanghalafano Kalumbi Shangula okwa ti ngee okutandavela kwombuto yoAIDS moNamibia okwa twikile nokukala pondodo opo ku li paife, okuxulifa po oAIDS ongoupyakadi moshikondo shouhaku otashi ka dulika ku ka ningwe momudo 2023.
Minista Etitatu okwa ti omafyo ombuto yoHIV-AIDS moNamibia okwa shuna pedu neenghono.
“Ovanhu ovo ve li kepango ove li ashike nawa, ohava i koilonga. Ngeno owa monene monakudiwa keshe exuliloshivike oku na ashike omafudiko.
“Ihamu shi mono vali osho. Otwa ninga elunduluko liwa neenghono,” Minista osho a ti ngaho.
“Ngee osho ngaa tashi i ngaha ngaashi shi li paife, otashi dulu shi kale shoshili,” Osho a ti ngaho.
Shangula okwa ti Namibia okwa longa mokulwifa oAIDS, ovanhu ve dulife peepelesenda 90 ovo ve li kepango otava ulike onghalo iwa neenghono.
Eshi osha hala kutya itava dulu okutandaveleka ombuto kuvakwao vali.
“Okutandaveleka ombuto otaku kala ku li pedu neenghono. Paife ngee owa mono poima pu na odjo tai dulu okutandavaleka, osha hala kutya omunhu mukwao ita dulu okukwatwa. Divadiva ombuto ohai fi, sho osho osho nee sha pumbiwa,” Minista osho a ti ngaho.
Okwa ti eshi osha hala okutya nomoNamibia itamu ka kala okutandaveleka kwombuto kupe shaashi ovanhu vahapu ovo ve li kepango itava dulu vali okuyandja ombuto kwaavo ovo vehe nasha.
Ehangano loUnited Nation olo li nasha nopolohalama yoHIV-AIDS (UNAIDS) otali ka pitifa olopota ipe, i li koshi yoshipalanyole ‘The Urgency of Now: AIDS at a Crossroads’, omanga oshoongalele shoAIDS oshiti25 shopaunyuni inashi ka ningwa koGermany.
UNAIDS okwa shiivifa kutya olopota otai ka ulika kutya okuxulifa po oAIDS ongoupyakadi wakula koundjolowele otashi ka dulika momudo 2030, ashike oshinima osho otashi dengwa neenghono komumbwe yoshimaliwa notashi fininike oufemba womunhu.
“Ombuto yoHIV oi li pokuuya pexulilo: Eyokomesho ile edopo loshinima eshi otali likolelele kondjila oyo ovaleli tava kufa,” UNAIDS osho ya ti ngaho.
“Ngee okwa kufwa ondjila yapuka pakuyandja oipumbiwa inai wana ile okukala inaku fimanekwa oufemba womunhu otashi eta ashike ombuto i twikile nokutandavela, osho tashi ka pula eemwenyo dihapu notashi ka lyatela onghalo youndjolowele pedu mounyuni,” Opolohalama osho ya kunghilila ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
