Ombili Foundation ya pumbwa ekwatho

OMBILI Foundation ya totwa po momumvo 1989, ehala lyaayelele, li li ookilometa 19 muuzilombugantu wOshivelo moGuinas mOshikoto, oya pumbwa eyambidhidho lyoshimaliwa, iikulya nosho tuu aalongisikola shi na sha nokuyambidhidha aayelele mboka ye li mOsenda nomEhangano ndyoka.

The Namibian okwa talele po ehala ndyoka mEtitano nokulombwelwa oompumbwe ndhoka kOmukuluntu gwOsenda ndjoka tate Alfred Schultz noshowo nee kaakuluntu yAakwankala ano yAayelele mboka taya adhika pehala mpoka ye li 480 lwaampoka.
Mofaalama ndjika ya Ombili Foundation, ehala lyoohekata 10,000 ye li pewa kOmunafaalama gwedhina Klaus Jochen Mais-Rische momumvo 1990, e li pambula kofaalama ye yedhina Hedwigslust mpoka yoohekata 30,000, omu na oprimasikola ya za pongundu yotango sigo ontiheyali ndjoka yi na aanasikola 247. Opu na wo omuhandjo gu na aamati yaayelele ye li 40 naakadhona 40. Omusamane Schultz ota ti kutya Ombili Foundation otayi pandula noonkondo ,aandoishi mboka oyo unene haya kwathele Osenda yawo ndjika opo aayelele mbaka ya vule okuhupa hwepo pethimbo ndika. Aanasikola ayehe kumwe ye li 247 ohaya li omwiha posikola mpoka omanga mboka ye li mOmuhandjo haya li lutatu mesiku. Nande ongawo Schultz ota ti oya pumbwa eyambidhidho enene lyokukaleka po aayelele mbaka notaya pula aasihenda ye ya tondokele nomakwatho opo kuhupithwe aayelele mbaka, mboka pamuthigululwakalo ya kala ashike haya hupu muukongo wiithitukuti, mboka pethimbo ndika lyehumokomeho wa kelelwa niithitukuiti oyindji haya dhipaga nokulya kwali, pethimbo ndika ya kelelwa okukongwa nokudhipagwa. Schiultz ota ti pamayalulo ga ningwa po kIigwanahangana, oga mona kutya muuyuni omun na aayelele yeli 65,000 lwaampoka mboka 30,000 yomuyo taya adhika moNamibia noye li mo ya pumbwa okuunganekwa nokukwathelwa noonkondo. Schultz ota ti kutya aanafaalama yomomudhingoloko ngoka gwa Shivelo nOshomeya, mboka moofaalama dhawo mwa kala mu na aayelele mbaka oyendji, oye shi dhilaadhila mo nawa nokweeta po edhilaadhilo enene lyokusila oshimpwiyu aayelele mbaka, oshoka ngele oya ethiwa ngawo otaya ka mona iihuna monakuyiwa, unene tuu sho kaye na we sho taya li. Taku totwa po nee Ombili Foundation, yi sile oshimpwiyu aayelele mbaka, ngashi tashi ningwa pethimbo ndika.
Aayelele yomofaalama moka ohaya hongo wo iihongomwa yawo yopamuthigululwakalo mbyoka haya tula mositola yawo yi li mofaalama moka nohayi landwa po nee kAatalelipo, unene mboka ya za kiilongo yopondje. Oshimaliwa shoka tashi zi mo oshawo yoyene shokwiihupitha nasho noofamili dhawo mofaalama moka, ngashi okulanda otee, osuuka, omagadhi, omakaya nosho tuu. mofaalama moka omu na wo nee osikola yaanona yEpangelo okuza ograde yotango sigo ontiheyali, ya totelwe po momumvo 1993. Tayi longo nawa aanona yaayelele mpoka noshowo yomomuhandjo.