Ombila yiihakanwa yomboma mOmbaanga ya FNB oyi li monkalo ombwiinayi

OMBILA moka mwa fumfikwa aantu 17 yomiihakanwa 26 mboka, ya sile moshoponga shetopo lyomboma mOshitayi shOmbaanga ya First National Bank mOshakati oomvula omilongo mbali dha piti po, oyi li monkalo ombwiinayi noonkondo.

Ombila ndjika yili momawendo ga Elcin pOngwediva, otayi ulike ya longelwa uuwinayi. Omathano ogendji goonakusa oga tatuka, ga tenda omisa omanga gamwe ga pomboka iipambu, ito vulu we okudhimbulula kutya nakusa ngoka olye. Omathano gane oga kana po pomahala gago, nomathano owala gane gomomathano 17 ge li inaga longelwa uushanda. Ekuma ndjoka lya tungilwa kombila ndjika olili lya kulupa nayi nolya tenda omisa ominene, tali vulu okuteka ombinga yimwe. Edhidhiliko enene lyomushigakano ndjoka lya tulwa kEyendo ndika, olye endeka no itali ulike lya kolela ko. Otashi ulike kutya ombila ndika oya pumbwa esiloshimpwiyu.Emanya lyedhimbuluko olya li lya patululwa pambelewa kOmupresidende gwa Hifikepunye Pohamba, ethimbo kwali taku dhimbulukiwa oomvula omilongo mbali lyoshiponokela shika. Emanya ndika olya tungwa komeho yOmbelewa yIiyemo yEpangelo nolya patululilwe momasiku 26 April omumvo gwa zi ko kOmupresidende.Ethimbo ndika aantu oyendji otaya pula Epangelo kutya oombila dhaakondelimanguluko dhi li pomahala ogendji moshilongo, nadhi tulwe omadhidhiliko ga faathana opo ku dhimbulukiwe kwaayehe ekuthombinga lyawo mekondjelomanguko.Menindjela gwOmbaanga yOtango yOpashigwana mOshakati Thomas Koneka Iindji, kepulo kutya iilonga yalye okukalekapo ombila ndjika, okwa ti kutya oofamili dhoonakusa nadhi kuthe ko oshinakugwanitha shoku kaleka ombila ndjika monkalo ombwaanawa.’Ombaanga oya ulika nale eitulemo lyayo mokudhimbulukwa oshiningwanima shika sho yatulapo edhidhilipo lyopandjokonona mOshakati. Otwa gandja wo ondhimbulutho ndika momake gOlaata yIikulunima yOpashigwana yi ninge eliko lyEpangelo. Ngele olya yonagulwa momukalo gwontumba, epangelo oli na okukutha ombinga moku opaleka omapuko kehe tali ningilwa. Onkee oofamili nadho nadhi kuthe wo ombinga mokwoopaleka ombila ndjika yaakwanezimo yawo yi monike nawa,’ Iindji ta popi ngaaka.Oku na owala omasiku aasi mbaka ya gwanithe oomvula omilongo mbali sho ya thigipo uuyuni mbuka momukako nguka omudhigu, ihe ombila yawo otayi monika ya dhimbiwa.