Ombaanga Yotango Yopashigwana ya yamukula

OMBAANGA yotango yopashigwana [FNB] oya yamukula oshinyolwa sha holokele mo the Namibian, kutya ka pe na we omaindilo taga ningwa molwa okulanda iikwamalusheno lwetango.

Oshinyolwa osha ti ombaanga oya hulitha po okutaamba omaindilo molwaashoka aniwa oya tsakaneke omaupyakadhi naagandji yiilongitho yomalusheno ngaka noshowo kutya aaindili oya fa kaaya uviteko.Meyamukulo ombaanga oya ti konyala oomiliona hamano ndhoka dha li dha gandjwa kIigwana Hangano[UNDP] omolwa elalakano ndika oyo ya pupo, onkene ombaanga ita yi vulu we okugandja omikuli omipe kombinga yolusheno lwetango.Ombaanga oya li ya pewa iilonga mbika okukala omulongipamwe nUuministeli wIikwamina Noonkondo, mombinga yoonkondo hadhi ningululwa, pethimbo oshilonga shika sha tulilwe miilonga muJuli nuumvo.Namibia Renewable Energy Programme[Namrep] ehangano ndika olyo lya li ta li wilike iilonga yokugandja olusheno nduka pehala lyIigwana Hangano.Elandulathano ndika pamushangwa gwombaanga olya fala sigo opo ku tungwa kwiikwamalusheno yetango 12 yomiitopolwa 13 ya Namibia. Omayakulo ogendji oga li ga pewa aa indili oyendji yomuyo oyo mboka aaniilonga haya pewa oondjambi, mboka haya ilongele yoyene aanangeshefa naanafaalama mbaka oyo ooyene yomalusheno ngaka omawana haga tema iitaga nayipike uushitwe, go ohaga pungula oshimaliwa.Konima ye tulo miilonga ndika oprograma ndjika oya li ya tseyithwa shinene moshilongo ashihe, miikundaneki ,naashika osha li woo sha tseyithwa pomauliko giipindi gaNgwediva.Oombapila dhomaindilo gomalusheno odha li tadhi adhikwa piitayi yoombaanga dhotango dhi li 48 moshilongo ashihe.Shika osha ende kashona ndele konima sho aantu ya tseya shika oya tameke okulanda omalusheno gawo nopamukalo nguka oshimaliwa shika osha pupo mbala.Sigo oompaka ombaanga oya ti ota yi taamba omaindilo omape ndele iimaliwa, yomalusheno ngaka oya pwa po nale.Ombaanga oya li yi na oku hulitha po shika oshoka aaningi yomaindilo oya li oyendji okuyeleka niimaliwa mbyoka ya li po ,pahapu dhomuwiliki gwehumitho komeho lyoongeshefa, Danny Titus.Omushangwa ogwa ti iipumbiwa noshowo oompango kombinga yiimaliwa mbika odha uvathanwa pokati kepangelo, ombaanga noUndp, mbika oya li ya ningwa iipu ngaashi kutya naku ninga eindilo ota vulu oku pewa omukuli shampa ashike ta ulike kutya oha longo na oha vulu okumona iiyemo yoodola 2 500, na ota ulike eli omuniilonga piilonga ye mbyoka uule woomvula dhi vulithe mbali lwaampoka.Ombaanga oya gandja omukuli shampa iinakugwanithwa mbika ya gwanithwa po komwiindili gwiimaliwa.Ombaanga oya longitha woo aagandji yomayakulo ye li nawa opo iilonga yomalusheno ngaka yi kale yokolela.Iimaliwa yomikuli mbika oya futwa yuukilila kaagandji yomayakulo konima sho iilonga yoludhi nduka ya manithwa.