Ombaanga yoStandard ta yi nkondopeke aaniilonga

OMBAANGA ya Standard moNamibia oya tula miilonga ethaneko lyokunkondopeka aaniilonga yayo mokuya pa ya lande iipambuliko mehangano, pethimbo yi ipyakidhila noku lundulula omutungilo gwayo.

Omukuluntu gwombaanga ndjika moNamibia, Mpumzi Pupuma okwa ti iipambuliko itayi gandjwa oshali ndele oyi na okulandwa kaaniilonga mboka yena ehalo okuyi landa. Pupuma okwa tseyitha kutya ehangano yina ya Standard Bank oya tokola oku landitha po iipambuliko yoopersenda 10 mombaanga kaaniilonga yomombaanga moNamibia, taya landa ooperesenda dhili hetatu omanga aakwashigwana taya tulilwa dhawo moshiketha sheinekelo molupe lwooperesenda mbali. Okwa ti aaniilonga mboka ye li mongundu ndjoka yaamboka ya talikwako ya pumbwa okunkondopekwa oyo ayeke taya ka pewa iipambuliko molupe nduka ongo onkatu yotango. Omanga aaniilonga mboka ita ya piti mokulandithwa iipambuliko pamukalo nguka ota ya ka pewa iipambuliko iishona oshali kehe gumwe. Pupuma okwa gwedha ko tati mpoka sha pumbiwa ehangano ota li kagandja oshimaliwa opo li futile mboka ya hala oku landa iipambuliko. Okwa tseyitha ishewe kutya omahangano agehe ngoka geli kohi yehangano ndyoka olyo yina ya Standard Bank otaga ka tulwa kohi yombaanga ya Standard Namibia. Konima ye landitho lyiipambuliko mbyoka noshowo etaambathano lyomahangano ngoka, ombaanga ya Standard otayi ka nyolwa momusholondondo gwomapungulo gopaipumbuliko gwa Namibia, [Namibia Stock Exchange.