Ombaanga yOmapendulepo ya Namibia ya zimine omikuli odhindji

OMBAANGA yOmapendulepo yaNamibia[DBN] oya zimine okugandja omikuli 25 dhongushu yoodola oomiliona 214,91 uule woomwedhi hamano dha piti okuza lyotango lyApilili sigo 31 lya Kotoba nuumvo.

Oshipambu oshinene shiimaliwa mbika osha pewa omahangano ngoka ga mono iilonga nenge ootendela miipungu yuunamapya, mokulonga po iilongomwa, mokutunga, momayakulo, muupashioni, mokulanditha omaliko, noshowo miikwamakwatathano gopautechnology.Omikuli mbali ominene odha pewa omahangano gopapangelo, Telecom Namibia ngoka a taamba oodola oomiliona 120 opo a opaleke iilonga yomakwatathano gopangodhi na ehangano lyo Road Fund Administration olya taamba oodola oomiliona 40 li opaleke ontompa yokomulonga gwaKavango mondjila onene yedhina Trans Caprivi.Omikuli omikwawo odha gandjwa momwaalu oku za poodola omayovi 180 000 noomiliona 17, 4.Omukuluntupitithi gwOmbaanga ndjika omusamane, David Nuyoma okwa ti opwa tegelelwa kutya iilonga mbika ya pewa iimaliwa mbika otayi ka eta po oompito dhiilonga dhili 1 064 ta dhi kalele noompito dhiilonga yopakathimbo dhi li 937, noshowoo tadhi kalekepo iilonga nale yaaniilonga yeli 36.Iilonga yimwe mbyoka ya ziminwa oyo ngaashi omukuli gwoodola oomiliona ne ta dhi pewa Omhalanga Mills opo yi tungepo oshini shokukweya epungu mOngwediva, okulanditha koshigwana shomomudhingoloko ngoka noshowo kaalandi muumbugantu wAngola.Iimaliwa iikwawo oya pewa ehangano lyokutunga lyedhina Kheiseb Construction CC opo li tunge, ohostela , okombitha, noshowo oshinyanga shokulila po sekundo sikola ya Sangwali moshitopolwa sha Caprivi. Ndjika ota yi kutha po oodola oomiliona 17,4. Oodola oomiliona 6,3 ota dhi pewa SP Brick Warehouse a lande eshina lyokutholoma oondhopi poHelao Nafidi moshitopolwa sha Hangwena.Oodola oomiliona 3,35 ota dhi pewa Kazo Farming opo a tungepo okatomeno konyama yongombe poGobabis moshitopolwa shOmaheke.