Ombaanga ya Standard ya patulula Oshitayi shayo mOkalongo

OMBAANGA ya tseyika nawa ya Standard moNamibia, mOlyomakaya ngaka ga zi ko geti 30 Mei 2009, oya egulula pambelewa Oshitayi shayo oshinene pOnandjaba mOkalongo mOshitopolwa sha Musati.

Omukuluntukuluntu gwOmbanaga ya Standard moNamibia, omusamane Mpumzi Pukuma pamwe nOmukalelipo gwElenga enene lya Kalongo tatekulu Timotheus
Nakapala oyo ya egulula pambelewa Oshitayimbaanga shOmbaanga ya Standard pOnandjaba mOkalongo moka, omanga Omukuluntu gwOpashitopolwa gwOmbaanga ndjika tate Matti Kanalelo, oye a taamba aanashituthi ayehe, ya li ya
thikama unene maanangeshefa, mAaleli yOpamuthigululwakalo, maanafaalama noshowo nee maakwashigwana yalwe yomOkalongo nomomudhingoloko noku ya
pandula sho ye ya okutala nkene oshitayimbaanga shawo tashi egululwa pambelewa noku shi pewa ngeyi pambelewa.
Omunambelewa Omukuluntu gwOshikondo shomalanditho mOmbanaga ya Standard omusamane Thaddius Maswahu oye a wilike oshituthiegululo shOshitayimbaanga shika. Oshitayimbaanga shika oshi li momatungo omape ga NDC pOnandjaba mOkalongo moka, shoka sha tungwa po kOkampani yokutunga yedhina Oudano Bricks mewiliko lyomunangeshefa a tseyika nawa Kaleb Hamwele.
Pethimbo ta taamba ayehe koshituthi shika nokutseyitha Omukuluntu gwOmbaanga ndjika tate Pukuma koshigwana sha li mpoka, Omukuluntu gwOpashitopolwa gwOmbaanga ya Standard Matti Kanalelo, okwa ti kutya Ombaanga yawo ya Standard onkee tayi tsikile nokutamununa mo egandjo lyomayakulo gayo koshigwana.
Kanalelo, ngoka oye Omukuluntu gwOmbanaga ndjika okuza kOshitopowla sha Caprivi, sha Kavango, Oshikoto ombinga yimwe noshowo sha Hangwena, sha Shana, sha Musati nosha Kunene, ta ti molwashoka Oshitopolwa shomoNooli ya Namibia, osho shi na aantu oyendji moNamibia, osha pumbwa shi andjaganekelwe omayakulo gOpambaanga nosho tuu opo oshigwana shaamoka shi kale itashi ende oondjila oonde okuya kOosenda dhomayakulilo, ngashi sha kala po nale.
Kutya nee ondoolopa ontshona shi thike peni, tse otatu gandja aluhe ondjundo kongushu yEmona, notu li nee aluhe twiilongekidha okukonaakona oompito oompe dhomayakulilo giilonga yopambaanga yetu,’ Kanalelo ta ti ngawo.
Pethimbo ta popitha aanashituthi, omusamaner Pupuma, okwa ti kutya okuuvite nawa lela sho ye shi pondola oku eta omayakulo bgOmbaanga yawo kOkalongo hoka kwa kala ompumbwe yomayakulo gOmbaanga ndjika onene lela.
Ta ti Ookastoma moshitopolwa odhindji omanga ndhoka oompe nadho wo dhi li po tadhi uluka ko esiku kehe. ‘Onkee ano okuya kOstandard Bank huka oshinima oshinene nosha simana. Ombaanga ndjika oyeni yene, yi takamithene na yi longitheni nawa, oshoka otashi vulika oombotsotso wo dhi ka kale dhe yi shineka nuumbudhi wadho.
Ombaanga oyeni noye mu teta omagulu okuya kOoshakati nosho tuu,’omusamane Pupuma ta ti nokulombwela Aakalongo kutya Ombaanga ndjika ya Standard Bank onene oshoka oyi li miilongo 33 nohayi yakula iigwana niigwana nombili nonondjungu.
Ta ti moNamibia Ombaanga yawo ohayi kwatha wo noonkondo. Tate Pupuma ta ti ngashi pethimbo lyefundja, Ombanaga yawo ndjika oya kwathela Epangelo N$200,000 li ikwathe mokukwathela oonakuhepekwa komeya gefundja. Ta ti omasiku ga zi ko oya gandja Okapandi kOodola dha Namibia Emiliona limwe nomayovi omathele gatano (N$1,500,000) li opalekithe Oshipangelo shEpangelo sha Shakati paikako itatu, kehe shimwe tashi ka kotha OoN$500,000.
Omusamane Pupuma ta gwedha po ta ti Ondoolopa ya Eenhana oye yi pa N$100,000 yi ikwathele pethimbo lyOmaulikilo gOpaipindi ngoka taga ka kala ko muule wethimbo twa thinda mo.
Ta ti wo kutya kakele keetopo lyOshitayimbaanga oshipe sha Kalongo, Ombaanga ya
Standard oya oya shitulula wo Oshitayimbaanga shayo sha Shikango shaoka sha kalam sha yama kOmbaanga yawo onene ya Ndangwa, noku shi ninga Ombaanga yuudhilila molwashoka Oshikango otashi ende tashi koko pa mona nomu na Ookastoma dhawo odhindji lela.
‘Tse yOmbaanga ya Standard otu li lela tu uvite nawa sho tatu gandja omayakulo gatya shooo ngeyi koshigwana notu uvite wo nawa sho Ombaanga yetu tayi koko ngeyi noshigwana nokuya komeho,’Pupuma ta ti ngawo nokwiindila
kOmukuluntu gwOmbaanga ya Standard moNooli, tate Matti Kanalelo kutya ngeno mOmbaanga moka mu kutwe aaniilonga yomOshitopolwa shoka sha
Kalongo, opo kukandulwe po wo onkalo yokwaa na iilonga mOshitopolwa.
Omukalelipo gwElenga enene lya Kalongo tatekulu Matias Walaula, ano tatekulu Timotheus Nakapala oye a gandja omapandulo pehala lyAakalongo ayehe.
Oshitayimbaanga shika shomOkalongo otashi kala mewiliko lyOmuniilonga omukulu mOmbaanga ndjika noku li omvalele ya Kalongo meme Ruth Mwanyangapo.