Omayovi 300 000 ha ga paluthwa pomanongelo

KONYALA aanona omayovi 9 585 okuza komanongelo 1 200 oha ya pewa iikulya pomanongelo payambidhidho lyepangelo.

Omukuluntu mombelewa yelongo, Alfred Ilukena okwa ti oku palutha kwaanona huka poosikola oku na elalakano oku kandulapo okwaathike pamwe moompito dhelongo, noshowo okwaandjaganeka oompito dhokunongekwa kwaamboka yadhinika noyeli komushigo gwonkalamwenyo. Ilukena okwa ti egandjo lyiikulya pomanongelo oku kuthapo ondjala pakathimbo unene tuu mokati kaanona yoothigwa naamboka yeli moluhepo.Oshinima shika osha indjipaleke eshangitho lyaanona noshowo eyo kosikola noshowo aanona ohaya pulakene nawa momanongelo. Pethimbo egandjo lyiikulya lya gandjelwe miikaha yepangelo okuza kehangano lyiikulya muuyuni omimvo 16 dha pitipo, aanona omayovi 78 000 oyo kwa li haya pewa iikulya. Pethimbo ndika aanona konyala omayovi omathele 269 585 oha ya mono iikulya, naashika oshililepo oopersenda 50 dhaalongwa mboka ye li mooprima sikola moshilongo. Ilukena okwa ti omuperesidende Hifikepunye Pohamba okwa indile kutya omwaalu gwaanona mboka ta ya pewa oondya nagu indjipalekwe sigo opaanona omayovi gomathele 300 000. Shika okwa ti, osha simana opo aanona ayehe yeli moluhepo ya vule oku kala ta ya mono iikulya yi li nawa no tayi tungu, naashika ota shi ya hilile woo kelongo. Oshikondo shelongo osha li noshigongi kombinga yokuhwepopeka epalutho lyaanona momanongelo. Oshigongi osha tala kombinga yomuthika gwiikulya mbyoka hay gandjwa kaanona mbaka kutya oyi li nawa noyo ngushu.