Omayooloko pokati kewiliko lyoshitopolwa nolyondolopa

OTAKU hokololwa kutya opena ehilathano mokati kewiliko lya Swapo, naashika otashi piyaganeke omakwatathano pokati kombelewa ya Gavena naandjoka ya Meya gwa Gobabis.

Otaku hokololwa aniwa kutya etopoko ndika olya ziilile maawiliki yoSwapo, nosheeta oongundu mbali, yimwe oyaamboka taya yambidhidha omukwatakanithi gwositopolwa Job Muniaro omanga onkwawo oondjoka yili konima ya Festus Ueitele ngoka ngashingeyi eli oshilyo shaatotimpango yoSwapo na okwa li nale oye omukwatakanithi gwongundu ndjoka moshitopolwa Omaheke. Ota ku tiwa ewiliko lyondoolopa olya gama ku Ueitele omanga aanambelewa yelelo lyoshitopolwa oya gama ku Muniaro monkambadhala ye yokuulikwa ongo omukwatakanithi gwoSwapo moshitopolwa.Ehilathano pokati ka Ueitele na Muniaro olya tamekele omumvogu sho Ueitele aniwa a tindi okugandjapo uuthemba we woku shaina uuna, iimaliwa tayi kuthwa kokambo kombaanga yoSwapo moshitopolwa Omaheke.Okambo hoka oke li moshitayi mbaanga shombaanga yimwe poGobabis. Omukwatheli gwopaumwene gwa gavena , Laura Mcleod Katjirua, Platini Katjaoha okwa lombwele Nampa , ati pokuma opena oshinima shokuulikathana ominwe pokati kelelo lyoshitopolwa naandyoka lyondoolopa ya Gobabis.Okwa ti opwa li pwa popiwa kutya elelo lya Gobabis olina omaipulo kombinga yoproyeka yedhina Namibia Angola Housing Initiative, ndjoka ya thanekwa okweetwa moshilando shoka. Okwa ti ewiliko lyoshilando olya ziminine li gandje ehala mpoka tapa ka tamekwa iilonga ku NAAHI, ndele ngashingeyi ewiliko ndyoka aniwa olya fa inaa li hala nawa oku yambidhidha oproyeka ndjoka opo yi tulwe miilonga, unene molwaashoka ndjika oya etwapo kungoloneya gwoshitopolwa Omaheke.Katjaoha ngoka a li nale Meya gwa Gobabis okwa lundile ewilikolyoshilando shoka kutya oshinine gavena. Muiniaro sho a pulwa kwaashika okwa ti osha fa oombelewa dhomawiliko ngaka gaali itaadhi longele we kumwe okweendeleleka etulo miilonga lyoproyeka yaNAAHI. Okwa ti oku wete kutya shika osho uupayakadhi weeta etopoko ndyoka. Okwa li woo a pula kutya omolwashike ewiliko lya Gobabis lya ndopa oku kala poshigongi sha NAAHI sha ningilwe mu February nomu Maalitsa nuumvo. NAAHI okwa thaneka oku tunga ehala lyoongeshefa, ehala lyokuthikama oololi, noshowo ehala lyoku landithila iimuna nolyoku tulila onyama miipakete po Gobabis. Iilonga ayihe mbika kumwe oya tengenekwa tayi ka kotha oodola oomiliona 800. Omuwiliki gwa NAAHI, Jose Oliveira okwa ti ehangano ndika oha li longele kumwe naandyoka lya South Africa Angola Housing InitiativeSAAHI, lina ethaneko lyokutunga omagumbo omiliona 1,2 moAngola. Onkene ehala lyoofabulika lya thanekelwa mo Gobabis lina ehala lyokuthikama oololi, ota li kala ha li thikama iiyenditho ya humbata iitungitho okuza koSouth Africa yuuka koAngola. Meya gwa Gobabis, Sila Bezuidenhoudt sho a pulwa ku Nampa kutya uunake iilonga mbyoka ta yi tameke, okwa ti otaya kundathana manga noshikondo shOmalelo giitopolwa niilando okuuva ngele na ya gandje ehala ku NAAHI. Okwa ekelehi omipopyo kutya yo oya fa inaa ya hala oku yambidhidha oproyeka ndjoka ya NAAHI.Okwa pula woo kutya omolwashike ombelewa ya gavena inaa yi mu hiya mosheendo shoka sha yile ko India oshiwike shayi. Okwa ti otashi vulika mboka yokombelewa ndjoka oyo yena uupyakadhi na muni gwa Gobabis.