Omaupyakadhi moofaalama dhomatulululo

AANAFAALAMA mboka ya tulululwa moofaalama muumbugantu woshilongo oya taalelwa komashongo ogendji, ngaashi iilongitho yomeya, noshowo ekwathelo lyopashimaliwa konima yetulululo lyankundipala.

Omupopiliko gwaanafaalama mbaka, Ulrich Davids okwa nyenyeta kombinga yomashongo ngaka pethimbo lyoshigongi nOminista yEvi omusamane Alpheus !Naruseb po Keetmanshoop etitano lya yi. Okwa ti aniwa oomboola poofaalama dhimwe kadhi na we omeya.Pahapu dha Davids konyala oomvula mbali ngashingeyi sho ya kala ta ya uvanekelwa kutya iilongitho mbika ota yi ka opalekwa ndele sigo oompaka inapa ningwa sha.Okwa ti aanafaalama oya landitha po iimuna yawo yimwe opo ya opaleke iilongithwa yomeya mbika. Davids okwa ti nonando oyendji yomaanafaalama oya ningi omaindilo gomikuli kOmbaanga Yuunamapya, ngaka ina ga ziminwa sigo etango ndi., omolwashoka ombaanga ndjika oyi li moonkundathana noministeli yomavi. Okwa nyenyeta woo ishewe kombinga yoongamba dhoofaalama dhawo, ndhoka a ti ina dhi ulikwa nawa no ta dhi eta eipumomumwe oshoka oyendji yomaanafaalama oha ya tende oongamba ndhoka yoyene.Okwa indile Uuministeli wOmavi wu gongele oshimaliwa opo yi longithwe oku tula po omalugumbo ge li nawa gopoongamba dhoofaalama.Omusamane!Naruseb okwa indile aanafaalama ya longithe omeya muukumwe omolwuuwanawa waa yehe. Okwa ti woo sho pwa ningwa ekonakono kombinga yiilongitho yomeya, aaniilonga oya pewa nale oshinakugwanithwa opo ya tameke okulonga iilongitho mbika. !Naruseb okwa ti epangelo olya ganjda oodola oomiliona 10 omanga Ombaanga Yuunamapya yagandja oodola oomiliona 10 opo dhi kwathele aanafaalama mboka opo ya tulululwa.Okwa tsu omuthindo kutya aanafaalama ashike mboka ya shaina euvathano lyoku hehela evi oyo taya ka pewa oshimaliwa ngele oya ningi eindilo.