Ovanhu ve dulife po120 000 ove li va teelela momusholondodo wehangano lokutunga omaumbo ledina National Housing Enterprise.
Omukulunhuwiliki wehangano loNational Housing Enterprise Gisbertus Mukulu okwa holola ouyelele ou pefimbo lokuyandja ouyelele mOvenduka Etivali.
Okwa ti omaumbo aeshe aa inaa pwa okutungwa moshilongo oku li lwopo300 000, osho sha ninga okuyandja omalukalwa oshinakuwanifa shakula.
“Omaumbo oo inaa pwa okutunga unene oyoo oshiwana shaNamibia osho shi na oiyemo ihe li pombada naavo ve na oiyemo i li pedu lela,” Mukulu osho a ti ngaho.
Okwa ti okukendabala okuxwepopaleka onghalo, oNHE oye ya po nomukalo muwa wokutunga omaumbo e na ombilixa.
Eshi osha kwa tela mo okutunga omaumbo ehe na oinima yondilo ngaashi eeshiilinga, outielesha nosho yo eegisha domeva apyu.
“Eshi otashi ningwa shaashi Ovanamibia vahapu itava dulu okulanda omaumbo e na ondilo unene. Ovanhu ava otava dulu nee okuwedela omaumbo avo ngee onghalo yavo yoshimaliwa ya xwepopala,” Osho a ti ngaho.
Mukulu okwa ti oNHE oya tula eendado dayo pedu shaashi oi na oshinakuwanifa shokutungila ovanhu ovo ve na oiyemo i li pedu omaumbo.
Ehangano eli oli na okudja ngaa peumbo londuda imwe yokunangala fiyo eumbo leenduda nhatu dokunangala, oo haa kosho oshimaliwa okudja poN$80 000 fiyo N$200 000.
Okudja momudo 1990, epangelo ola tunga omaumbo e li 81 291 okupitila mopolohala yedina Build Together, opolohalama yokuyambula po omalukanda nosho yoo moNHE, okupopya ko ashike dimwe.
The Namibian okwa li a lopota muMarsa kutya eepelesenda 67 dovanhu ovo ve li meedoolopa natango odi li meebashu, osho sha hala okutya Ovanamibia ve fike lwopo979 762 natango ove li meebashu.
Eshi osha kalela po omaumbo e li 231 831 momalukanda e li 299.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
