Omauliko giipindi pEenhana mu Juli

OMAULIKILO gIipindi ngoka haga kala ko omvula kehe pEenhana mOshitopolwa sha Hangwena, nuumvo otaga ka kala ko okuza eti 26 sigo 31 Juli 2010 pEenhana mpoka nokwa tegelelwa Aanangeshefa oyendji, aanene, aashona naapokati, yomeni noyopondje yoshilongo, ya ka kuthe ombinga onene momaulikilo ngaka giikwaipindi.

Ngashi shito, nonuumvo Elelo lyOndoolopa ya Eenhana, ndyoka olyo li li mwene gwOmaulikilo gIikwaipindi ngaka, olya li lya longekidha po Uulalelosumina wa dhenga mbanda, ongulohi yOlyomakaya ga zi ko, moka mwa umbwa oshimaliwa shi thike pOoN$230,500, iikombo iyali, ekuthiloko mokulanda iinyanyangidhi kOngeshefa ya Waltons kOshakati noshowo uumbindja wongushu yooN$6000 no Ms Expo 8000.Ombaanga ya Standard ndjoka oyo yi li omuyambidhidhi omunene gwOmaulikilo ngIipindi ya Eenhana, oyo ya gandja oshindji sho ya ekele po okapandi kOoN$45,000, ya landulwa kOmbaanga yOtango yOpashigwana (FNB) ndjoka ya gandja OoN$30,000 nokEhangano lyOongodhi dhOoselefona lya MTC ndyoka lya gandja OoN$15,000. Ombaanga yEhumithokomeho ya Namibia oya gandja OoN$10,000 noshowo nee aanangeshefa, omahangano, ookampani noohandimwe ya gandja wo okuza pooN$10,000 ya thinda pevi. Oshituthi shoka sha li sha wilikwa, kOmunambelewa Omukuluntupitithi gwElelo lya Hangwena tate, Daniel Kashikola nOmunambelewa Omukuluntupitithi gwOndoolopa ya Eenhana tate, Walde Ndevashiya, osha li sha kalwa nokupopithwa kOmunambelewa Omukuluntupitithi gwEhangano lyAanangeshefa enene tate, Tarah Shaanika nokomukulukadhi gwe meme Selma Shaanika, ku Meya gwOndoolopa ya Eenhana me, Julia Shikongo nOokaansela dhe dhondoolopa noshowo ndhoka dhOpashitopolwa sha Hangwena, kongundu onene yaanangeshefa yoongeshefa dhi ili nodhi ili. Mokutaamba ayehe koshituthi shika, Meya gwa Eenhana mee, Julia Shikongo, okwa ti kutya momumvo 2008, Elelo lya Eenhana okupitila muye olya li lya gongaleke oshigwana oshinangeshefa pEenhana noku shi lombwela kutya yo ongElelo lya Eenhana, oya tokola okuhumitha komeho Ondoolopa yawo nokuhila aapunguli, ano aanangeshefa yee ya tunge mEenhana, nosha ningwa shili, oshoka pethimbo ndika aanangeshefa oyendji oye ya okutunga mEenhana.Meya Shikongo ta ti kutya oya eta po wo nokuli oshinima oshinene mEenhana, shoka hashi ithanwa Omaulikilo gIipindi. Oshinima shoka hashi hili noonkondo aanangeshefa aashona, aanene naapokati yee ya ulike iilikolomwa yawo nokuninga omatokolo ya tunge nokutula oongeshefa dhawo mOndoolopa ombwanawa yaEenhana, ngashi tashi monika pethimbo ndika, Eenhana tadhi adhima koongeshefa. Meya Shikongo ta indile kaanangeshefa ya tsikile nokuya ya tunge mEenhana, opo kugandjwe iilonga koshigwana nokuhumitha ngeyi komeho Emona lya Eenhana noshitopolowa ashihe.Mokugandja Omushangwahokololo gu na sha nolweendo lweyokomeho lyondoolopa ya Eenhana nOmaulikilo giipindi mondoolopa ndjika ga ka pita, tate Ndevashiya, okwa ti kutya Eenhana nOmaulikilo giipindi gayo, oya huma komeho noonkondo. Ashike nande ongawo mEenhana omwa pumbwa natango okutungwa oshindji shopahumokomeho. Ta ti omwa pumbwa okutungwa Osenda onene yOongeshefa oonene, Omahooli, Oshipangelo shOpaumwene,ohotela, omagumbo gaaniilonga ge li nande opamukalo gUufleta uuwanawa nowopashinanena, oshiputudhilo shopombanda sha UNAM nosho tuu. Ndevashiya ta ti ayihe mbika oya tokolwa kElelo lya Eenhana yi ka tungwe mEenhana muule wethimbo twa thinda mo. Ta ti yimwe oya tamekwa nayo nale nokuli okutungwa, nenge okuthanekwa.Mokupopitha aanashituthi shika, omusamane, Tarah Shaanika okwa pandula noonkondo, Elelo lya Eenhana sho tali shi enditha nawa mokuhumitha komeho ondoolopa ya Eenhana ngeyi, unene tuu sho kehe omvula hali longekidha po Omaulikilo gIikwaipindi nokweeta ngeyi aanangeshefa aashona naapokati pamwe ya ulike iilikolomwa yawo noku yi landitha po yo wo taya shiwathana nokupanga uukuume nuukahewa paunangeshefa. Omusamane Shaanika ta ti, omaulikilo giipindi gEnhana naga tse omukumo epindikathano pokati ka Namibia na Angola noshowo iilongo yilwe yopuushiinda, molwashoka opu niwe lela ompumbwe onene yepindikathano pokati kiilongo yi ili noyi ili ya Africa. Shaanika ta ti, Afrika otaka ya ashike komeho pamona ngele iilongo ya Africa tayi tameke okupindikathana nawa nopankalo tayi kalelele.Omusamane Shaanika ta ti okuza momumvo 2005, epindikathano pokati ka Namibia na Angola olya ya pombanda. Oshoka momumvo 2005, okwa li ashike kwa yalulwa oshimaliwa shOobiliona1,5, ashike omvula ya zi ko, 2009, omapindikathano oga yi pombanda sigo opoobiliona 4 lwaampoka. Shaanika, ta ti, Afrika, oku na iilikolomwa oyindji lela nokwa pumbwa ashike, a kale nombepo yuumwayinathana nokutameka ta landathana naamwayina yiilongo yi ili noyi ili menenevi lya Africa. Ta gandja uusama, konkalo yopoongamba mpoka, oololi dhaanageshefa hadhi kala ethimbo ele momikweyo. Ta ti sha li ashike sha pumbiwa tadhi konaakonwa meendelelo nokuya hoka dha thinda opo dhi ka thikithe iilandithomwa kookastoma dhawo meendelelo ongashi tashi vulika.Ta indile wo kuuministeli wIikwameni wu talulule oshinima shOovisa, molwashoka nasho oshi li endangalati enene meenditho lyiinima yAanangeshefa naanangeshefa yoyene.Pethimbo ta gandja Otjeke yOoN$45,000 kElelo lya Eenhana, Omukuluntu gwoshitayimbaanga sha Standard mOshakati, tate Hakaye, okwa ti kutya Ombaanga ye onkee tayi ka tsikila nokuyambidhidha Omaulikilo gIipindi gOndoolopa ya Eenhana, nonando omvula ndjika ya gandja oshishona molwomahupilo muuyuni ga kala itaga ende nawa. Omunashipundi gwOshitayihangano lyAanangeshefa mEenhana tate Mungonena, okwa pandula ayehe ye yile koshiithanene shika noku ya pandula wo mwaashoka ya gandja po. a pandula unene omusamane, Tarah Shaanika ngoka a zi kOvenduka e ye e ya popithe nokugandja sha wo, paumwene, kElelo lya Eenhana, li longekidhe nawa Omaulikilo giipindi galyo.