Omaulikilo gOpaipindi mOndjiva koAngola oguudha Aanamibia

OMAULIKILO gOpaipindi ngoka ga tamekele mOndjiva mOshitopolwa sha Cunene muumbugantu waAngola mEtitano lyeti 10 Juli 2009 notraga kala ko sigo ometi 8 Auguste 2009, oguudha Aanangeshefa aashona naapokati yaNamibia oyendji, unene tuu mboka yomoNooli ya Namibia.

Omaulikilo gIipindi goludhi nduka, ngoka Osenda yago yi li lela ketameko sho to yi mOndjiva, kombinga yokolulyo loye, okuzilila kOshikango nokOnamacunde, omatiyali okuza sho omvula ya zi ko ga ningilwe ngaa natango mOndjiva moka. Omunangeshefa a tseyika nawa tate Benjamin Hauwanga mwene gwoongeshefa dha BH mwa kwatelwa Opaaka yomOngwediva, oye thimbayinongodhi, ano oye omulongekidhi omunene gwOmaulikilo gOpaipindi ngaka palongelokumwe nOshitayi shEhangano lyaanangeshefa moNamibia naandjoka lyaAngola mOshitopolwa sha Cunene muumbugantu waAngola moka mewiliko lya tate Bauleth.Gavena yOshitopolwa (Governo Provincial Do Angola), omusamane Antonio Dalelwa oye a egulula Omaulikilo gIipindi ngoka mOndjiva moka komatango lela gEtitano lya zi ko nokwa pandula aalongekidhi yOmaulikilo gIipindi ngaka. Ta taamba ayehe ye ya okuulika iikwaipindi yawo kOmaulikilo ngoka noshowo ayehe ye ya notaye ya okutalela po omaulikilo ngaka mOndjiva moka muule wIiwike mbyoka ine yomaulikilo ngaka. Dalelwa ta ti ayehe kumwe Aanamibia, Aangola nosho tuu taya kutha ombinga momaulikilo gIipindi moka naya kale mombili, meuvathano, muukumwewumwe wopaunangeshefa nowopaumwayinathana. Gavena Dalelwa ta ti kutya edhilaadhilo ndika lyokuninga Omaulikilo gIikwapindi kehe omvula mOndjiva, moka aanangeshefa ya Angola na Namibia nosho tuu haye ya pamwe nokuulika iikwapindi yawo yo taya tseyathana nokupanga uukahewa nuukuume muunangeshefa, oshinima sha simana noonkondo note shi tsu omukumo shi kale ko kehe omvula. ta ti muule woomvula tadhi ya otaga ka kala gatya shoo shi vulithe, shampa ashike oonakukutha ombinga taya longele kumwe moku ga humitha nawa komeho noku ga kaleka ge na ondjundo nongushu. Omunashipindi manga gwOshitayi shEhangano lyAanangeshefa moNooli tate Joseph (Kapya) Endjala, okwa lombwela The Namibian kutya Aanangeshefa aashona naapokati yAanamibia ye li 142 lwaampoka oye li taya kutha ombinga momaulikilo gIikwaipindi mOndjiva moka omanga aatelelipo mboka ya pitila mEhangano lyAanangeshefa okuya kOndjiva ye li 450 ye li taya talele po omaulikilo ngaka kOndjiva hoka. ‘Shika oshikando oshitiyali shAanamibia taya kutha ombinga mOmaulikilo gIikwaipindi kOndjiva mu Angola, okuza sho ga ningilwe ko omvula ya zi ko. Oge holike noonkondo kwaayehe, unene tuu aanangeshefa yetu ya Namibia, mboka ya thikama unene moomeme, oye ga hole noonkondo nohaya mbombolokele ko uuna ga thika,’Endjala ta ti ngawo.Ashike, tate Endjala okwa ngungutula po ngaa uunima wumwe kau li nawa, hau ningilwa aanangeshefa pOmweelo gwopoongamba gwa Shikango. Ta ti Aanambelewa yamwe poongamba mpoka, ohayi ikuthile Oveta momake kuyo yene nohaya hala okutaaguluka omalandulathano ga tulwa po pauvathano kAakuluntu nokaalongekidhi yOmaulikilo ngaka. Unene haya hala ya pewe oombumbo kaanangeshefa opo ya pite nokupititha iinima yawo pomweelo mpoka. Nande ongawo, tate Endjala ta ti, oshinima shika oye shi kundathana nAawiliki nonAakwanepangelo Aakuluntu, notashi ka mwenekwa meendelelo ngashi tashi vulika. Onkalo yomeya noshowo yolusheno ndjoka kayi li naanaa nawa hoka, Endjala okwa ti nayo otaye yi opaleke naakuluntu aakwawo.Omunangeshefa a tseyika nawa womElyambala mOngwediva tate Hesekiel Kondjeni, a tseyika nawa nedhina tate Pondo, ngoka ta longele kumwe na tate Ben Hauwanga mokutunga Omatala moka tamu tulwa nee uutala womaulikilo gIikwaipindi kaanangeshefa yamwe, ota ti kutya mehala moka oya tula mo nale omeya naanageshefa taya ulike iikwaipindi yawo kumwe naatalelipo mOsenda yIipindi moka, otaya ka kala kaye na nande ompumwe yomeya.Pethimbo The Namibian a talele po Osenda yIipindi ndjika mOndjiva moka mEtiatano lya zi ko, okwa adha Hauwanga in ipyakidhila nokukwathela aanangeshefa yakwawo mboka ya zi koNamibia noshowo mboka ya Angola moku ya pa omahala mOsenda moka.’Otwa pandula kompito yi li ngeyi yokuya koAngola kOndjiva huka nokuulika iilandithomwa yetu tse wo tatu landitha yetu nokupanga uukuume naanangeshefa yakwetu huka,’meme Linda Josef, meme Albertina Ekandjo, meme Ndamononghenda Nambili, meme Lucia Niilenge na meme Sylvia Egumbo taya ti ngawo omanga meme Elizabeth Barnabas, meme Ziita Shinyenga, meme Christina Mathias na meme Fransiska Fransisco, taya ti kutya oya pandula kedhilaadhilo lyokutula po ethimbo ele lyomaulikilo gIikwaipindi mOndjiva, oshoka otashi ya pe ompito ombwanawa yokushingitha iinima yawo noshowo okushiwanathana naanageshefa yakwawo ya Namibia noyaAngola nosho tuu, sho wo tashi ya pe ompito yokupanga nawa uukahewa nuukuume wopaunangeshefa. Aanangeshefa ayehe ya popiwa nayo koThe Namibian, oya pandula eetopo lyOmaulikilo gIikwaipindi mOndjiva, ashike mboka ya za koNamibia, otaya ti kutya eyakulo lyopoomweelo gwopoongamba pOshikango nali talululwe, kali li nawa. Aantu otaya piti po nothina unene nokungwandjagulwa inashi pumbiwa pokati ka Namibia na Angola.